ചെന്നൈ: ന്യൂസിലാന്റ് എ ടീമിനെ മൂന്നാം മത്സരത്തിലും തകർത്ത് ഇന്ത്യൻ യുവനിര. ആദ്യ രണ്ടു മത്സരവും ജയിച്ച് പരമ്പര സ്വന്തമാക്കിയ സഞ്ജുവും കൂട്ടരും മൂന്നാം മത്സരം 106 റൺസിന്റെ ഗംഭീര ജയത്തോടെ സ്വന്തമാക്കി.
ടോസ് നേടി ആദ്യം ബാറ്റ് ചെയ്ത ഇന്ത്യ എ 284 റൺസെടുത്തപ്പോൾ ന്യൂസിലാന്റ് എ ടീം 39-ാം ഓവറിലെ മൂന്നാമത്തെ പന്തിൽ 178 റൺസിൽ എല്ലാവരും പുറത്തായി. വിക്കറ്റ് കീപ്പർ ബാറ്റർ ഡെയ്ൻ ക്ലെവർ 83 റൺസുമായി ശക്തമായി പ്രതിരോധിച്ചെങ്കിലും മറ്റാർക്കും മുപ്പതു റൺസ് പോലും എടുക്കാനായില്ല. ആറ് ബാറ്റർമാർ രണ്ടക്കം തികയ്ക്കാതെ പുറത്തായി.
നാല് വിക്കറ്റുകൾ വീഴ്ത്തിയ രാജ് ബാവയാണ് ന്യൂസിലാന്റിന്റെ തകർച്ച വേഗത്തിലാക്കിയത്. രാഹുൽ ചാഹറും കുൽദീപ് യാദവും രണ്ടു വിക്കറ്റുകൾ വീതം വീഴ്ത്തിയപ്പോൾ ഋഷി ധവാനും രാഹുൽ ത്രിപാഠിയും ഓരോ വിക്കറ്റും നേടി.
ആദ്യം ബാറ്റ് ചെയ്ത ഇന്ത്യൻ നിരയിൽ മുന്നിൽ നിന്ന് നയിച്ച നായകൻ സഞ്ജു 54 റൺസ് നേടി ടോപ് സ്കോററായി. 68 പന്തിൽ ഒരു ഫോറും രണ്ടു സിക്സറുമടക്കമാണ് സഞ്ജു അർദ്ധസെഞ്ച്വറി നേടിയത്. 50 റൺസോടെ തിലക് വർമ്മയും മധ്യനിരയിൽ അവസാന ഓവറുകളിൽ തകർത്തടിച്ച് 51 റൺസ് നേടിയ ഷാർദ്ദൂൽ ഠാക്കൂറും മികച്ച പിന്തുണയാണ് നൽകിയത്.
Comments