കൊല്ലം: നിരോധിത മതഭീകരസംഘടനയായ പോപ്പുലർ ഫ്രണ്ട് ജനറൽ സെക്രട്ടറി അബ്ദുൾ സത്താറിന്റെ അറസ്റ്റ് രേഖപ്പെടുത്തി എൻഐഎ. അബ്ദുൾ സത്താറിനെ ചോദ്യം ചെയ്യുന്നതിനായി കൊച്ചിയിലെ എൻഐഎ ആസ്ഥാനത്ത് എത്തിച്ചു. കൊല്ലം പോലീസ് ക്ലബ്ബിൽ നിന്നും കസ്റ്റഡിയിൽ എടുത്ത സത്താറിന്റെ അറസ്റ്റ് വൈകീട്ടോടെയാണ് രേഖപ്പെടുത്തിയത്.
യുഎപിഎ നിയമത്തിലെ 120ബി,153എ എന്നീ വകുപ്പുകൾ പ്രകാരമാണ് അറസ്റ്റ് രേഖപ്പെടുത്തിയത്. എൻഐഎ ആസ്ഥാനത്തെ ചോദ്യം ചെയ്യൽ പൂർത്തിയായ ശേഷം അന്വേഷണ സംഘം തുടർ നടപടികൾ സ്വീകരിക്കും. ഡൽഹിയിലെ എൻഐഎ ആസ്ഥാനത്തേക്ക് കൊണ്ടുപോകാനാണ് സാദ്ധ്യത. നേരത്തെ കേരളത്തിൽ നിന്നും അറസ്റ്റിലായ എട്ട് പോപ്പുലർഫ്രണ്ട് നേതാക്കൾ നിലവിൽ ഡൽഹി എൻഐഎയുടെ കസ്റ്റഡിയിലാണ്.
എൻഐഎ രജിസ്റ്റർ ചെയ്ത കേസിലെ മൂന്നാം പ്രതിയാണ് അബ്ദുൾ സത്താർ. എൻഐഎ പരിശോധനയുടെ പേരിൽ ഹർത്താലിന് ആഹ്വാനം ചെയ്ത ഇയാൾ പിന്നീട് ഒളിവിൽ പോകുകയായിരുന്നു. പോപ്പുലർ ഫ്രണ്ടിനെ നിരോധിച്ചതിന് പിന്നാലെ സംഘടന പിരിച്ചുവിട്ടതായി അബ്ദുൾ സത്താർ മാദ്ധ്യമങ്ങളോട് പ്രതികരിച്ചിരുന്നു. ഇതിന് പിന്നാലെ കൊല്ലം പോലീസ് കസ്റ്റഡിയിൽ എടുത്ത് എൻഐഎയ്ക്ക് കൈമാറുകയായിരുന്നു.
