ഉണക്കമുന്തിരി മിക്കയാളുകൾക്കും ഇഷ്ടപ്പെട്ട ഒരു ഡ്രൈ ഫ്രൂട്ടാണ്. എന്നാൽ ചിലരാകട്ടെ പായസത്തിലും ലഡ്ഡുവിലുമൊക്കെ കാണുന്ന മുന്തിരി പ്രത്യേകം മാറ്റിവെക്കാറുണ്ട്. ചെറിയ പുളിപ്പോടുകൂടിയ ഉണക്കമുന്തിരിയുടെ രുചി താൽപര്യമില്ലാത്തവരാണ് ഇക്കൂട്ടർ. വിവിധ മധുര പലഹാരങ്ങളിലും മറ്റും നാം ഉണക്കമുന്തിരി ചേർക്കാറുണ്ട്. എന്നാൽ ദിവസേന ഉണക്കമുന്തിരി കഴിച്ചാൽ ഗുണങ്ങൾ ഒരുപാടുണ്ടെന്ന് പലർക്കുമറിയില്ല. അവ എന്തെല്ലാമാണെന്ന് നോക്കാം.
ശരീരത്തിനാവശ്യമായ നിരവധി വിറ്റാമിനുകളും ധാതുക്കളും ആന്റിഓക്സിഡന്റുകളും ഉണക്കമുന്തിരിയിൽ അടങ്ങിയിട്ടുണ്ട്. കൂടാതെ ഇതിൽ റെസ്‌വെറാട്രോൾ എന്നറിയപ്പെടുന്ന ഫൈറ്റോകെമിക്കൽ അടങ്ങിയിട്ടുണ്ട്. ഇത് ശരീരത്തിലെ കൊഴുപ്പ് കുറയ്‌ക്കാൻ സഹായിക്കുന്നു.
ഉണക്കമുന്തിരിയിൽ ധാരാളം ഫൈബർ അടങ്ങിയിരിക്കുന്നതിനാൽ മലബന്ധം തടയുകയും ദഹനപ്രക്രിയ സുഗമമാക്കുകയും ചെയ്യും. മലവിസർജ്ജനം മെച്ചപ്പെടുത്താനും സഹായിക്കും.
ഉണക്കമുന്തിരിയിൽ മഗ്‌നീഷ്യം, പൊട്ടാസ്യം എന്നീ ഘടകങ്ങൾ അടങ്ങിയിട്ടുണ്ട്. അതിനാൽ വയറിനുണ്ടാകുന്ന അസിഡിറ്റി പ്രശ്‌നങ്ങൾ പരിഹരിക്കാൻ ഉണക്കമുന്തിരിക്ക് കഴിയും. ശരീരത്തിലെ പിഎച്ചിന്റെ അളവ് നിയന്ത്രിക്കാനും സാധിക്കും.
ഈ ഡ്രൈ ഫ്രൂട്ടിൽ അടങ്ങിയിരിക്കുന്ന ചില ആന്റിഓക്സിഡന്റുകൾ ശരീരത്തിലെ ഫ്രീ റാഡിക്കലുകളെ തടയുകയും ക്യാൻസറിനുള്ള സാധ്യത തടയുകയും ചെയ്യുമെന്ന് പഠനങ്ങൾ തെളിയിച്ചിട്ടുണ്ട്. ഇരുമ്പ്, കോപ്പർ, ബി കോംപ്ലക്‌സ് തുടങ്ങിയ ഘടകങ്ങളും ഉണക്കമുന്തിരിയിലുള്ളതിനാൽ വിളർച്ച (അനീമിയ) തടയാനും ഉണക്കമുന്തിരിക്ക് കഴിയും.
ദിവസേന വെള്ളത്തിലിട്ട് കുതിർത്തോ ഭക്ഷ്യവിഭവങ്ങളിൽ ഉൾപ്പെടുത്തിയോ എല്ലാം ഉണക്കമുന്തിരി കഴിക്കാവുന്നതാണ്. വെറുതെ സ്‌നാക്ക്‌സ് ആയും ഉണക്കമുന്തിരി കഴിക്കാം.
