ജീവിതത്തിൽ അൽപ്പ സ്വൽപ്പം ഏകാന്തത ഇഷ്ടപ്പെടുന്നവരാണ് മനുഷ്യനടക്കമുള്ള ജീവികൾ. വ്യക്തി ജീവിതത്തിന് അത് മർമ്മ പ്രധാനമാണുതാനും.എന്നാൽ ഏകാന്തത മാത്രം ഇഷ്ടപ്പെടുന്നവരെ കാത്തിരിക്കുന്നത് ഒരു കൂട്ടം രോഗങ്ങളാണെന്നാണ് കണ്ടെത്തൽ. ജീവിതശൈലികളെയും പാരമ്പര്യത്തെയും പോലെ തന്നെ മാനസികാരോഗ്യവും നമ്മുടെ ആയുസിനെയും യുവത്വത്തെയും കാര്യമായി ബാധിക്കുന്നുണ്ടെന്നാണ് പഠനം.
ചൈനയിലെ ഡീപ് ലോംഗ്വിറ്റി ലിമിറ്റഡിന്റെ ഗവേഷകസംഘത്തിന്റെ പഠനത്തിൽ ഏകാന്തത മനുഷ്യനെ വേഗത്തിൽ വൃദ്ധനാക്കുമെന്നാണ് പറയുന്നത്. ഗവേഷകരുടെ അഭിപ്രായത്തിൽ ഏകാന്തത പുകവലിയേക്കാൾ അപകടകാരിയാണത്രേ. സമൂഹവുമായി തീരെ ഇടപഴകാത്ത ഒരു വ്യക്തിയെ സംബന്ധിച്ചിടത്തോളം അയാൾക്ക് അകാലമരണം സംഭവിക്കാനുള്ള സാധ്യത ഏറെയാണ്. മാത്രമല്ല,അമിതവണ്ണം മൂലം ഒരു വ്യക്തിക്ക് ഉണ്ടാകാവുന്ന ദൂഷ്യഫലത്തിന്റെ രണ്ടു മടങ്ങിനെക്കാളും ഒരു വ്യക്തി ”ദിവസവും 15 സിഗരറ്റ് വലിക്കുന്നതിനേക്കാളും ആണ് ഏകാന്തത ഉണ്ടാക്കുന്ന അപകടമെന്നാണ് ഗവേഷകർ പറയുന്നത്.
ഏകാന്തത മാനസികാരോഗ്യത്തെ ബാധിക്കുകയും പ്രായമാകലിന് കാരണമാകുകയും ചെയ്യുന്നുവെന്നതിന് ഗവേഷകർ വ്യക്തമായ തെളിവും നിരത്തുന്നുണ്ട്.ഏകദേശം 12,000 ത്തോളം വരുന്ന ചെറുപ്പക്കാരിൽ വർഷങ്ങളോളം നീണ്ട ഗവേഷണ നിരീക്ഷണത്തിലൂടെയാണ് പഠനഫലത്തിലേക്കെത്തിയത്. ജീവിതത്തിന് അർത്ഥമില്ലെന്നോ. പ്രതീക്ഷകൾ അസ്തമിച്ചതായോ ഉള്ള തോന്നൽ,നഷ്ടബോധം,മനസിന് നിയന്ത്രണം ഇല്ലാതാവുക എന്നിവയെല്ലാം ഏകാന്തതയിലേക്ക് നയിക്കുന്ന കാരണങ്ങളാണ്.
ഏകാന്തത അനുഭവിക്കാനുള്ള തന്റേതായ കാരണങ്ങൾ സ്വയം കണ്ടെത്തുകയോ അല്ലെങ്കിൽ ഡോക്ടറുടെ സഹായത്തോടെ കണ്ടെത്തി പരിഹരിക്കുകയോ ചെയ്യുന്നതാവും നമ്മുടെ ആരോഗ്യത്തിന് ഉത്തമം.
Comments