അടുപ്പുകൂട്ടി ഭക്ഷണം പാചകം ചെയ്യുന്ന വീടുകൾ അപൂർവ്വ കാഴ്ചയായി മാറിക്കൊണ്ടിരിക്കുകയാണ് നമ്മുടെ നാട്ടിൽ. മൂന്ന് കല്ലുകൾ കൂട്ടി ഉണ്ടാക്കിയ അടുപ്പിൽ നിന്ന് പുകയില്ലാത്ത അടുപ്പിലേക്കും,പിന്നെ അത് ഗ്യാസ് അടുപ്പിലേക്കും, ഇലക്ട്രിക് അടുപ്പകളിലേക്കും മാറിയത് വളരെ വേഗമാണ്. ഗ്യാസ് അടുപ്പുകൾ ഇക്കൂട്ടത്തിൽ മലയാളികൾക്ക് കുറച്ചുകൂടി പ്രിയം. എന്നാൽ ഗ്യാസ് പെട്ടെന്ന് തീരുന്നു. കൂടെക്കൂടെ ഗ്യാസ് വാങ്ങാൻ പണം ചിലവിടേണ്ടി വരുന്നു തുടങ്ങിയ പരാതികൾ ആളുകൾ ഉയർത്താറുണ്ട്. പാചകവാതകത്തിന് ചിലവ് കുറയ്ക്കാനുള്ള ചില സൂത്രവിദ്യകൾ അറിഞ്ഞാലോ?
പ്രധാനമായും ചോറ് വെയ്ക്കാനാണ് മലയാളികൾ പാചകവാതകം ഏറ്റവും കൂടുതൽ ചിലവിടുന്നത്. ഇത് കുറയ്ക്കാൻ ഒരു വഴിയുണ്ട്. അരി നന്നായി കഴുകി അത് അരമണിക്കൂറിലധികം വെള്ളത്തിൽ കുതിർത്ത് വെയ്ക്കുക. ഇങ്ങനെ എടുത്തുവെച്ച അരി ഉപയോഗിച്ച് ചോറ് വെയ്ക്കുന്നത് പാചകവാതക ഉപയോഗം കുറയ്ക്കും. അരി കുതിർന്നതിനാൽ വേഗത്തിൽ വേവുന്നതാണ് ഇതിന് കാരണം.
ഇന്ധനം ലാഭിക്കാൻ പ്രഷർ കുക്കർ ഉപയോഗിക്കുക. ഇത് പാചകവാതകവും സമയവും ലാഭിക്കുന്നു. എന്ത് പാചകം ചെയ്യുമ്പോഴും ആവശ്യത്തിന് മാത്രം വെള്ളം ഉപയോഗിക്കുക,കറികൾ തിളച്ച് തുടങ്ങുമ്പോൾ തീജ്വാല കുറയ്ക്കുന്നതും ഗ്യാസ് ഉപയോഗം കുറയ്ക്കുകയും കറികൾ രുചികരമാക്കുകയും ചെയ്യും. ആഴം കുറഞ്ഞതും വീതിയുള്ളതുമായ,വിശാലമായ പാത്രങ്ങൾ ഇന്ധനം ലാഭിക്കുന്നു. 25 ശതമാനം വരെയാണ് ഉയരം കുറഞ്ഞ പാത്രങ്ങൾ പാചകവാതകം ലാഭിക്കുന്നത്.
താപനഷ്ടം സംഭവിക്കാതിരിക്കാൻ പാചകം ചെയ്യുന്ന വസ്തു നന്നായി മൂടുക.പയറുവർഗങ്ങൾ പാചകം ചെയ്യുന്നതിന് അഞ്ച് മണിക്കൂർ മുൻപെങ്കിലും കുതിർത്ത ശേഷം പാചകം ചെയ്യുക. റഫ്രിജറേറ്ററിൽ സൂക്ഷിച്ച ഭക്ഷണസാധനങ്ങൾ തണുപ്പ് മാറിയതിന് ശേഷം മാത്രമേ ചൂടാക്കാവൂ.
ഗ്യാസ് സ്റ്റൗവ്, പാചകം ചെയ്യുന്ന പാത്രങ്ങൾ വൃത്തിയായി സൂക്ഷിക്കുക, സ്റ്റൗവിന്റെ ബർണറുകളിലെ അഴുക്ക്, കരി എന്നിവ ഗ്യാസ് ചില് കൂട്ടും. ആഴ്ചയിലൊരിക്കൽ ബർണർ വൃത്തിയാക്കാം. സ്റ്റൗവിന് മുകളിൽ തിളച്ചു വീഴുന്ന ഭക്ഷണം അന്ന് തന്നെ തുടച്ചുമാറ്റാം.
കോപ്പർ,സ്റ്റെയിൻലെസ് സ്റ്റീൽ പാത്രങ്ങളാണ് വേഗത്തിൽ ചൂടാവുന്നതും ചൂട് എല്ലാ വശത്തേക്കും വ്യാപിപ്പിക്കുന്നതും.പാചകം ചെയ്യാനുള്ള പാത്രം കഴുകി തുടച്ച ശേഷം മാത്രം അടുപ്പിലേക്ക് വെച്ചാൽ മതി. ഭക്ഷണം തയ്യാറാക്കാനുള്ള ചേരുവകളെല്ലാം തയ്യാറാക്കി വെച്ച ശേഷം മാത്രം പാചകം ചെയ്യാൻ നോക്കുക. അല്ലെങ്കിൽ അരിയാനും മറ്റുമായി പോയി ഇന്ധനനഷ്ടം വരാം.
പാചകം വേഗത്തിൽ നടക്കുന്നതിനായി വലിയ ബർണർ ഉപയോഗിക്കുന്നവരാണ് ഭൂരിഭാഗം ആളുകളും. എന്നാൽ വലിയ ബർണറിനെക്കാളും ചെറിയ ബർണർ ഉപയോഗിക്കുന്നത് 10 ശതമാനം വരെ ഗ്യാസ് ലാഭിക്കും.
ഇത്രയും കാര്യങ്ങൾ ശ്രദ്ധിച്ചാൽ നമുക്ക് വലിയ അളവ് വരെ പാചകവാതകം ലാഭിക്കാനാവും.
Comments