യുവരാജ് സിംഗിന്റെ ഗോവയിലെ വീട് വാടകയ്ക്ക് കൊടുക്കാനൊരുങ്ങി താരം. ഗോവയിലെ അദ്ദേഹത്തിന്റെ അവധിക്കാല വസതിയായ കാസ സിംഗ് വിനോദയാത്രികർക്ക് തുറന്നു കൊടുക്കാനാണ് തീരുമാനം. 1200 രൂപ നൽകിയാൽ ഈ ആഡംബര വസതിയിൽ ഒരു രാത്രി മുഴുവൻ തങ്ങാം.
ഗോവയിലെ ചപ്പോര നദീതീരത്താണ് ഈ ആഡംബര വസതി സ്ഥിതി ചെയ്യുന്നത്. ആറ് പേരടങ്ങുന്ന സംഘത്തിന് വീട് ബുക്ക് ചെയ്യാം. ഗോവയുടെ സാംസ്കാരിക പൈതൃകവും മൂല്യവും എടുത്തുകാണിക്കുന്ന വീട് സന്ദർശകർക്ക് വേണ്ടി നൽകുന്നതിൽ തനിക്ക് സന്തോഷമുണ്ടെന്ന് യുവരാജ് സിംഗ് ഇൻസറ്റഗ്രാമിൽ കുറിച്ചു.
മോർജിം ഗോവയിൽ ചപ്പോര നദിയുടെ വടക്കൻ തീരത്ത് സ്ഥിതി ചെയ്യുന്ന, വെള്ളയും മണ്ണും കലർന്ന നിറങ്ങളാൽ അലങ്കരിച്ച കാസ സിംഗ്, ഗ്രീക്ക് സൈക്ലാഡിക് വാസ്തുവിദ്യയുടെയും പരമ്പരാഗത ഗോവൻ രീതികളുടെയും മിശ്രണമാണ്. ആഡംബര നീന്തൽ കുളവും സ്വിം അപ്പ് ബാറും ഉൾപ്പെടെയുള്ള സൗകര്യങ്ങൾ ഇവിടെയുണ്ട്. മെയിൻ ബെഡ്റൂമിന്റെ ബാൽക്കണിയിൽ നിന്നുകൊണ്ട് അറബിക്കടലിന്റെ സൗന്ദര്യം ആസ്വദിക്കാനാകും. യുവരാജ് സിംഗിനെ നേരിട്ട് കാണാനുള്ള അവസരവും നിങ്ങൾക്ക് ലഭിച്ചേക്കാം.
