മുവാറ്റുപുഴ: അന്താരാഷ്ട്ര ബാലിക ദിനത്തോടനുബന്ധിച്ച് സ്ട്രീറ്റ് ഫുഡ് ഫെസ്റ്റ് നടത്തി വിദ്യാർത്ഥിനികൾ. മുവാറ്റുപുഴ സെന്റ് അഗസ്റ്റിൻ ഗേൾസ് എച്ച് എസ് എസ്സിലെ വിദ്യാർത്ഥിനികളാണ് ഇത്തരമൊരു വ്യത്യസ്ത ആശയവുമായി എത്തിയിരിക്കുന്നത്. ഒക്ടോബർ 8, 9 ദിവസങ്ങളിലായാണ് പരിപാടി സംഘടിപ്പിച്ചിരിക്കുന്നത്. ഇന്ന് മുതൽ നടക്കുന്ന പരിപാടിക്ക് വൻ സ്വീകാര്യതയാണ് ലഭിച്ചിരിക്കുന്നത്.
സമൂഹത്തിൽ സ്ത്രീകളുടെ പങ്കാളിത്തം ഉറപ്പു വരുത്തുന്നതിന്റെ ഭാഗമായി മികവുറ്റ ആശയമാണ് നടപ്പിലാക്കുന്നത്. മൂവ്വാറ്റുപുഴ കെ എസ് ആർ ടി സി ബസ് സ്റ്റാൻഡിന് സമീപം രാത്രിയാണ് സ്ട്രീറ്റ് ഫുഡ് ഫെസ്റ്റ് നടത്താനൊരുങ്ങുന്നത്. പാട്ടും ഡാൻസുമായി സ്കൂളിലെ എൻ എസ് എസ് സന്നദ്ധ പ്രവർത്തകർ സംഘടിപ്പിക്കുന്ന പരിപാടി ഇതിനോടകം ജനശ്രദ്ധ പിടിച്ചുപറ്റി കഴിഞ്ഞു.
ബിഗ്ബോസ് താരം അപർണ മൾബറി വിദ്യാർത്ഥികളുടെ കൂട്ടായ്മയ്ക്ക് ഐക്യദാർഢ്യം പ്രഖ്യാപിച്ച് കൊണ്ട് വീഡിയോ പുറത്തിറക്കിയിട്ടുണ്ട്. സ്ട്രീറ്റ് ഫുഡ് ഫെസ്റ്റ് നടത്തി ലഭിക്കുന്ന പണം ചാരിറ്റി പ്രവർത്തനത്തിന് നൽകാനാണ് തീരുമാനിച്ചിരിക്കുന്നതെന്ന് സംഘാടകർ പറഞ്ഞു. സമൂഹത്തിൽ പെൺകുട്ടികൾ നേരിടുന്ന വെല്ലുവിളികളെ അതിജീവിച്ച് സ്ത്രീകൾ സ്വയം പര്യാപ്തത നേടുക എന്ന സന്ദേശമാണ് ഇതിലൂടെ നൽകുന്നത്. നിരവധി പെൺകുട്ടികളും രക്ഷിതാക്കളും അണിനിരന്ന പരിപാടിക്ക് വൻ പിന്തുണയാണ് ലഭിച്ചു കൊണ്ടിരിക്കുന്നത്.
സ്ട്രീറ്റ് ഫുഡ് ഫെസ്റ്റിന് സ്കൂൾ മാനേജ്മെന്റും, എം എൽ എ മാത്യു കുഴലനാടൻ, മുവാറ്റുപുഴ മുനിസിപ്പാലിറ്റി വികസന കാര്യ സ്റ്റാന്റിംഗ് കമ്മിറ്റ് ചെയർമാൻ അജി മുണ്ടാട് തുടങ്ങി നിരവധി പ്രമുഖർ പരിപാടിയിൽ പങ്കെടുത്തു.
Comments