നോയിഡ: മദ്യപിച്ച് ലക്കുകെട്ട യുവതികൾ ചേർന്ന് സുരക്ഷാ ജീവനക്കാരനെ മർദ്ദിച്ചതായി പരാതി. നോയിഡയിൽ സെക്ടർ 121-ലാണ് സംഭവം. ആക്രമണത്തിന്റെ ദൃശ്യങ്ങളും പുറത്തുവന്നിട്ടുണ്ട്. സെക്യൂരിറ്റിയുടെ കോളറിന് പിടിച്ച് സംസാരിക്കുന്ന സ്ത്രീയും ഇവർക്ക് പിന്തുണയുമായി മറ്റ് രണ്ട് സ്ത്രീകളും നിൽക്കുന്നത് ദൃശ്യങ്ങളിൽ കാണാം. മറ്റ് സുരക്ഷാ ജീവനക്കാർ എത്തിയാണ് യുവതികളെ പിടിച്ചുമാറ്റിയത്.
നോയിഡ സൊസൈറ്റിയിലെ അഞ്ചാര ഹോംസിൽ ഡ്യൂട്ടി ചെയ്യുകയായിരുന്ന പങ്കജ് എന്ന യുവാവിന് നേരെയാണ് മദ്യപിച്ച് ബോധംപോയ യുവതികളുടെ കയ്യേറ്റം. നോയിഡ സൊസൈറ്റിയിലെത്തിയ യുവതികളുടെ കാറിന് മേൽ സൊസൈറ്റി സ്റ്റിക്കർ ഇല്ലാതിരുന്നതിനാൽ സെക്യൂരിറ്റി ഇവരുടെ യാത്ര തടഞ്ഞിരുന്നു. മദ്യപിച്ച് ലക്കുകെട്ട് വരികയായിരുന്ന യുവതികൾ തുടർന്ന് പങ്കജിനെ കയ്യേറ്റം ചെയ്യാൻ ആരംഭിച്ചു. മറ്റ് സുരക്ഷാ ജീവനക്കാർ ചോദ്യം ചെയ്തപ്പോൾ അവരോടും യുവതികൾ അപമര്യാദയായി പെരുമാറി.
Looks like Noida finally has an identity 👏🏽 Fresh in from Sector 121, Ajnara Homes Society 👇🏽 pic.twitter.com/OpO1k1ozQf
— Shiv Aroor (@ShivAroor) October 8, 2022
സംഭവത്തിന് പിന്നാലെ പങ്കജ് പരാതി നൽകുകയും യുവതികൾക്കെതിരെ പോലീസ് നടപടിയെടുക്കുകയും ചെയ്തു. രണ്ട് സ്ത്രീകളെ പോലീസ് കസ്റ്റഡിയിലെടുത്തിട്ടുണ്ട്. ഒരാൾ ഇതിനിടെ ഒളിവിൽ പോയി. കസ്റ്റഡിയിലെടുത്തവരെ ലോക്കൽ മജിസ്ട്രേറ്റിന് മുന്നിൽ ഹാജരാക്കുകയും ചലാൻ അടപ്പിച്ച് വിടുകയും ചെയ്തു. മൂന്നാമത്തെ യുവതിക്കായി പോലീസ് തിരച്ചിലിലാണ്.
