ടെന്നീസ് ഇതിഹാസം റാഫേൽ നദാൽ അച്ഛനായി. നദാലിന്റെ ഭാര്യ മെറി പെരൽ ആൺകുഞ്ഞിന് ജന്മം നൽകിയതായി സ്പാനിഷ് മാദ്ധ്യമങ്ങൾ ശനിയാഴ്ച റിപ്പോർട്ട് ചെയ്തു. ദമ്പതികളുടെ ആദ്യ കുഞ്ഞാണ്. നദാലിന്റെ ഭാര്യ മല്ലോർക്ക ദ്വീപിലെ ക്ലിനിക്കിൽ ആൺകുഞ്ഞിന് ജന്മം നൽകിയതായി ദിയാരിയോ ഡി മല്ലോർക്കയും മറ്റ് സ്പാനിഷ് മാദ്ധ്യമങ്ങളും പറഞ്ഞു.
വർഷങ്ങളോളം നീണ്ട പ്രണയത്തിനൊടുവിൽ 2019ലാണ് നദാലും പെരലും വിവാഹിതരായത്. എന്നാൽ നദാലും കുടുംബവും കുഞ്ഞിന്റെ ജനനം സംബന്ധിച്ച് വ്യക്തമാക്കിയിട്ടില്ല. അദ്ദേഹത്തിന്റെ വ്യക്തിപരമായ കാര്യങ്ങളെക്കുറിച്ച് പ്രതികരിക്കില്ലെന്ന് നദാലിന്റെ പബ്ലിക് റിലേഷൻസ് സ്ഥാപനം പറഞ്ഞതായി അസോസിയേറ്റഡ് പ്രസ് റിപ്പോർട്ട് ചെയ്തു. 36 കാരനായ നദാൽ 22 ഗ്രാൻഡ്സ്ലാം കിരീടങ്ങൾ നേടിയിട്ടുണ്ട്.
