ബഹിരാകാശം എന്ന് കേൾക്കുമ്പോൾ തന്നെ നമുക്കെല്ലാവർക്കും ഒരു അത്ഭുതമാണ്. അവിടുത്തെ കാഴ്ചകൾ കാണാനും അറിയാനുമെല്ലാം നമുക്കെല്ലാവർക്കും വലിയ താത്പര്യം ആയിരിക്കും. ബഹിരാകാശത്തെ ജീവിതം, ഭൂമിയിലേതിൽ നിന്ന് വളരെ വ്യത്യസ്തമാണെന്ന് നമുക്കെല്ലാം അറിയാം. ഗുരുത്വാകർഷണം ഇല്ല എന്നതിനാൽ ഭാരം അനുഭവപ്പെടുന്ന അവസ്ഥയും ബഹിരാകാശ യാത്രികർക്ക് ഉണ്ടാകില്ല. ഭക്ഷണം കഴിക്കുമ്പോഴും ഉറങ്ങുമ്പോഴുമെല്ലാം ഈ അവസ്ഥ യാത്രക്കാരെ വലക്കാറുണ്ട്. ശരീരം എവിടെ എങ്കിലും കെട്ടി വച്ചാണ് യാത്രികർ ഉറങ്ങാറുള്ളത്. അല്ലാത്ത പക്ഷം അന്തരീക്ഷത്തിൽ പൊങ്ങിക്കിടക്കുന്നവർ യാത്രാപേടകത്തിന്റെ എവിടെ എങ്കിലും ചെന്ന് ഇടിച്ചാൽ അത് പേടകത്തിനും ഗുരുതരമായ പ്രശ്നങ്ങൾ ഉണ്ടാക്കും.
ബഹിരാകാശത്തെ ഉറക്കത്തിന്റെ ഒരു വീഡിയോ ആണ് ഇപ്പോൾ സമൂഹമാദ്ധ്യമങ്ങളിൽ വൈറലായിരിക്കുന്നത്. നാസയുടെ സ്പേസ് ഷട്ടിലിൽ നിന്നുള്ള ഒരു വീഡിയോ ക്ലിപ്പ് ആണിത്. വര്ഷങ്ങള്ക്ക് മുന്പ് ചിത്രീകരിച്ച വീഡിയോ ആണിതെന്നാണ് വിവരം. ഒരു സംഘം യാത്രികർ സ്ലീപ്പിംഗ് ബാഗിനുള്ളിൽ ഉറങ്ങുന്നത് വീഡിയോയിൽ കാണാം. ഉറങ്ങുകയാണ് എന്ന് നമുക്ക് തോന്നില്ല എന്നതാണ് ഇതിലെ ശ്രദ്ധേയമായ കാര്യം. വളരെ വിചിത്രമായ ഭാവങ്ങളാണ് ഇതിൽ നമുക്ക് കാണാനാകുന്നത്. പലരും മരവിച്ചതു പോലെ കൈകൾ അന്തരീക്ഷത്തിൽ പൊക്കിപ്പിടിച്ചിരിക്കുന്നതും കാണാം.
Sleeping in space is an important part of a mission, with impacts on the health, capabilities & morale of astronauts and it's not easy. Even the posture, due to micro gravity, ends up by looking totally unnatural as shown in this Shuttle footage [source: https://t.co/PhyzkVRvoN] pic.twitter.com/qmUZM7rreS
— Massimo (@Rainmaker1973) October 10, 2022
നിലവിൽ അന്താരാഷ്ട്ര ബഹിരാകാശ നിലയത്തിലെ യാത്രികർ എല്ലാ ദിവസവും എട്ട് മണിക്കൂർ ഉറങ്ങാറുണ്ടെന്നാണ് നാസ പറയുന്നത്. ലബോറട്ടറിയിലെ ദൈനംദിന പരീക്ഷണങ്ങൾ ആരംഭിക്കുന്നതിന് മുൻപാണ് ഉറങ്ങുന്നത്. യാത്രികർ ആരോഗ്യത്തോടെ ഇരിക്കണമെങ്കിൽ ഉറക്കം നിർബന്ധമാണെന്ന് നാസ ചൂണ്ടിക്കാണിക്കുന്നു. ഗുരുത്വാകർഷണം ഇല്ലാത്തതിന്റെ പ്രത്യാഘാതം മനുഷ്യശരീരത്തിൽ വരാതിരിക്കാൻ ഇത് സഹായിക്കുന്നുവെന്നും ശാസ്ത്രജ്ഞർ പറയുന്നു.
Comments