മുംബൈ: മുംബൈയിൽ ആകാശ വിളക്കുകൾക്ക് വിലക്ക് ഏർപ്പെടുത്തി മുംബൈ പോലീസ്. ഔദ്യോഗിക ഉത്തരവ് പ്രകാരം ഒക്ടോബർ 16 മുതൽ 30 ദിവസത്തേയ്ക്കാണ് മുംബൈയിൽ പറക്കുന്ന വിളക്കുകളുടെ ഉപയോഗവും വിൽപ്പനയും നിരോധിച്ചിരിക്കുന്നത്. ചൈനീസ് വിളക്കുകൾ എന്നും അറിയപ്പെടുന്ന ആകാശ വിളക്കുകൾ ഉപയോഗിക്കുന്നതും വിൽക്കുന്നതും സംഭരണവും നവംബർ 14 വരെയാണ് വിലക്കിയിരിക്കുന്നത്.
ആകാശ വിളക്കുകൾ ഉപയോഗിക്കുന്നത് മനുഷ്യന്റെ ജീവനും സുരക്ഷയ്ക്കും അപകടമുണ്ടാക്കുമെന്ന് മുംബൈ പോലീസ് വ്യക്തമാക്കിയിരുന്നു. സാമൂഹിക വിരുദ്ധരുടെ പ്രവർത്തനങ്ങൾ തടയുന്നതിന്റെ ഭാഗമാണ് ആകാശ വിളക്കിന് നഗരത്തിലും പരിസര പ്രദേശങ്ങളിലും നിരോധനം ഏർപ്പെടുത്തിയിരിക്കുന്നത്.
വിലക്ക് ലംഘിച്ച് വിളക്കുകൾ ഉപയോഗിക്കുന്നവർക്കെതിരെ കർശന നടപടി സ്വീകരിക്കാനാണ് പോലീസിന്റെ തീരുമാനം. ഉത്തരവ് ലംഘിക്കുന്ന ഏതൊരു വ്യക്തിയും ഇന്ത്യൻ ശിക്ഷാ നിയമത്തിലെ സെക്ഷൻ 188 (പൊതുസേവകന്റെ ഉത്തരവ് അനുസരിക്കാതിരിക്കൽ) പ്രകാരം ശിക്ഷ ലഭിക്കുമെന്നും മുംബൈ പോലീസ് വ്യക്തമാക്കി.
