സിൽഹട്ട്: വനിതാ ഏഷ്യാ കപ്പിൽ പാകിസ്താനെ പരാജയപ്പെടുത്തി ഫൈനലിൽ കടന്നതിന്റെ ആഹ്ലാദം താളക്രമത്തിലുള്ള നൃത്തച്ചുവടുകളിലൂടെ പ്രകടിപ്പിച്ച് ശ്രീലങ്കൻ താരങ്ങൾ. മൈതാനത്ത് ഫ്യൂഷൻ ഡാൻസിന് സമാനമായി നൃത്തം ചെയ്ത് കാണികൾക്ക് വിരുന്നൊരുക്കിയ ലങ്കൻ ടീമിന്റെ ആഹ്ലാദ പ്രകടനം സാമൂഹിക മാദ്ധ്യമങ്ങളിൽ വൈറൽ ആകുകയാണ്.
#ApeKello celebrating in style 💃
Sri Lanka qualified for the finals of the Women’s #AsiaCup2022 after winning against Pakistan by 1 run. pic.twitter.com/WXHkGcQJdd
— Sri Lanka Cricket 🇱🇰 (@OfficialSLC) October 13, 2022
വ്യാഴാഴ്ച നടന്ന ഏഷ്യാ കപ്പ് രണ്ടാം സെമി ഫൈനലിൽ ആയിരുന്നു പാകിസ്താനെതിരായ ശ്രീലങ്കയുടെ ആവേശ ജയം. ആദ്യന്തം ആവേശം നിറഞ്ഞു നിന്ന മത്സരത്തിൽ ഒരു റണ്ണിനാണ് ശ്രീലങ്ക പാകിസ്താനെ പരാജയപ്പെടുത്തിയത്.
സിൽഹട്ട് അന്താരാഷ്ട്ര സ്റ്റേഡിയത്തിൽ നടന്ന മത്സരത്തിൽ ശ്രീലങ്കൻ വനിതകൾ ടോസ് നേടി ബാറ്റിംഗ് തിരഞ്ഞെടുക്കുകയായിരുന്നു. അനുഷ്ക സഞ്ജീവനി, ഹർഷിത സമരവിക്രമ, നിലാക്ഷി ഡിസിൽവ, ഹസീനി പെരേര എന്നിവരുടെ ബാറ്റിംഗ് മികവിൽ ലങ്ക 20 ഓവറിൽ 6 വിക്കറ്റ് നഷ്ടത്തിൽ 122 റൺസ് നേടി. പാകിസ്താന് വേണ്ടി നാഷ്ര സന്ധു 3 വിക്കറ്റുകൾ വീഴ്ത്തി.
2 വിക്കറ്റുകൾ വീഴ്ത്തിയ ഇനോക രണവീരയുടെ ബൗളിംഗ് കരുത്തിൽ 20 ഓവറിൽ ശ്രീലങ്ക പാകിസ്താനെ 121/6 എന്ന സ്കോറിൽ ഒതുക്കുകയായിരുന്നു. 41 പന്തിൽ 42 റൺസ് നേടിയ പാകിസ്താൻ ക്യാപ്ടൻ ബിസ്മ മറൂഫിന്റെ പോരാട്ടം പാഴായി. അവസാന പന്തിലെ നിദ ദറിന്റെ റണ്ണൗട്ട് പാകിസ്താന്റെ പരാജയം ഉറപ്പിച്ചു. 26 പന്തിൽ 26 റൺസാണ് നിദ നേടിയത്. 4 ഓവറിൽ 17 റൺസിന് 2 വിക്കറ്റ് വീഴ്ത്തിയ ഇനോക രണവീരയാണ് മത്സരത്തിലെ താരം.
ഒക്ടോബർ 15 ശനിയാഴ്ച നടക്കുന്ന ഫൈനലിൽ ഇന്ത്യയാണ് ശ്രീലങ്കയുടെ എതിരാളികൾ. ഒന്നാം സെമിയിൽ തായ്ലൻഡിനെ 74 റൺസിന് പരാജയപ്പെടുത്തിയായിരുന്നു ഇന്ത്യയുടെ ഫൈനൽ പ്രവേശം.
Comments