ന്യൂഡൽഹി: ഇന്ത്യൻ സമ്പദ് വ്യവസ്ഥയുടെ മുന്നേറ്റത്തെ അവഹേളിച്ച് സ്പാനിഷ് പത്രത്തിലെ ലേഖനം. സ്പാനിഷ് വാരികയായ ലാ വാൻഗ്വാർഡിയയിൽ വന്ന ലേഖനവും ചിത്രവുമാണ് വിവാദത്തിലായിരിക്കുന്നത്. ഇന്ത്യയുടെ വളരുന്ന സമ്പദ്വ്യവസ്ഥയെക്കുറിച്ചാണ് ലേഖനത്തിൽ പറയുന്നത്. ഒന്നാം പേജിലാണ് വാർത്ത പ്രസിദ്ധീകരിച്ചത്. ലേഖനത്തിൽ ഇന്ത്യയുടെ സാമ്പത്തിക വളർച്ച ഒരു പാമ്പാട്ടിയിലൂടെയാണ് കാണിച്ചിരിക്കുന്നത്.
പാമ്പാട്ടിയുടെ കൊട്ടയിൽ നിന്ന് പാമ്പ് ഉയർന്നു വരുന്നതാണ് ചിത്രം. ഇത് ഒരു ഗ്രാഫിലാണ് കാണിച്ചിരിക്കുന്നത്. ‘ഇന്ത്യൻ സമ്പദ്വ്യവസ്ഥയുടെ സമയം’ എന്നാണ് ലേഖനത്തിന്റെ തലക്കെട്ട്.
ലേഖനത്തെ വിമർശിച്ച് നിരവധി പേരാണ് രംഗത്തെത്തിയിരിക്കുന്നത്. ഇന്ത്യയുടെ ശക്തമായ സമ്പദ്വ്യവസ്ഥയ്ക്ക് ആഗോള അംഗീകാരം ലഭിക്കുന്ന ഇക്കാലത്ത്, സ്വാതന്ത്ര്യം ലഭിച്ച് പതിറ്റാണ്ടുകൾ കഴിഞ്ഞിട്ടും ഇന്ത്യയുടെ ചിത്രം പാമ്പാട്ടിയിലൂടെ കാണിക്കുന്നത് വിഡ്ഢിത്തമാണ്. വിദേശ ചിന്തകൾ മാറ്റുന്നത് വളരെ ബുദ്ധിമുട്ടുള്ള കാര്യമാണെന്നും വിമർശനം ഉയരുന്നുണ്ട്.
സെരോദ സിഇഒ നിതിൻ കാമത്തും സ്പാനിഷ് പ്രസിദ്ധീകരണത്തിനെതിരെ ആഞ്ഞടിച്ചു. ഇന്ത്യൻ സമ്പദ് വ്യവസ്ഥയിലേക്ക് ലോകം ഉറ്റുനോക്കുന്നത് നല്ല കാര്യമാണെന്നും എന്നാൽ പാമ്പാട്ടിയുടെ കാർട്ടൂണിലൂടെ ഇന്ത്യയെ കാണിക്കുന്നത് അപമാനകരമാണെന്നും കാമത്ത് ട്വീറ്റ് ചെയ്തു. പ്രശസ്ത എഴുത്തുകാരൻ രജത് സേഥിയും സംഭവത്തിൽ വിമർശനവുമായി രംഗത്തെത്തിയിട്ടുണ്ട്.
