ന്യൂഡൽഹി: യുകെ ആസ്ഥാനമായുള്ള ഇന്റർനെറ്റ് സേവനദാതാക്കളായ വൺ വെബ്ബിന്റെ 36 ഉപഗ്രഹങ്ങൾ വഹിച്ചുകൊണ്ടുള്ള ഐഎസ്ആർഒയുടെ എൽവിഎം-3 റോക്കറ്റ് ഒക്ടോബർ 23-ന് വിക്ഷേപിക്കും. ഇസ്രോയുടെ ഏറ്റവും ഭാരമേറിയ റോക്കറ്റാണ് എൽവിഎം-3. വൺവെബ് ഇന്ത്യ-1 മിഷൻ എന്ന പേരിലാണ് വിക്ഷേപണം നടക്കുന്നത്. 5,400 കിലോഗ്രാം ഭാരമുള്ള ഉപഗ്രഹങ്ങൾ ഭ്രമണപഥത്തിലെത്തിക്കുന്നതോടെ ഇന്ത്യയുടെ ഉപഗ്രഹ വിക്ഷേപണ രംഗത്ത് പുതിയ ചരിത്രം സൃഷ്ടിക്കപ്പെടും. രാജ്യത്തിന്റെ വിവിധ ഭാഗങ്ങളിൽ ഇന്റർനെറ്റ് ലഭ്യമാക്കാനും പദ്ധതി സഹായകമാകും.
വേഗത കൂടിയതും തടസവും പ്രതികരണസമയവും കുറഞ്ഞതുമായ ബ്രോഡ്ബാൻഡ് സേവനം ബഹിരാകാശത്തു നിന്ന് നൽകുന്ന സേവനമാണ് വൺവെബ്ബ് ഇതിലൂടെ ലക്ഷ്യമിടുന്നത്. പദ്ധതി യാഥാർത്ഥ്യമാകുന്നതോടെ ഇന്ത്യയിലെ വിവിധ ഭാഗങ്ങളിൽ ബ്രോഡ്ബാൻഡ് ഇന്റർനെറ്റ് സേവനം ലഭ്യമാകും. ഏറ്റവും ബുദ്ധിമുട്ടേറിയ ഇടങ്ങളിൽ വൺവെബ് ബ്രോഡ്ബാൻഡ് സേവനം ലഭ്യമാക്കുമെന്നും ഇത് ഇന്ത്യയിലുടനീളമുള്ള ഡിജിറ്റൽ അന്തരം കുറയ്ക്കുമെന്നും കമ്പനി പറഞ്ഞു.
ലോഞ്ച് വെഹിക്കിൾ മാർക്ക്-3 (എൽവിഎം) എന്ന് പേര് മാറ്റിയ ജിഎസ്എൽവി ഉപയോഗിച്ചുള്ള ഐഎസ്ആർഒയുടെ ആദ്യ വാണിജ്യവിക്ഷേപണമാണ് 23-ന് നടക്കുക. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്ന് ഏഴ് മണിയ്ക്കാകും വിക്ഷേപിക്കുക. ഇതാദ്യമായാണ് ഇത്രയും ഭാരമേറിയ ഉപഗ്രഹം ഇന്ത്യ വിക്ഷേപിക്കുന്നത്. വാണിജ്യാടിസ്ഥാനത്തിൽ ഉപഗ്രഹങ്ങൾ വിക്ഷേപിക്കാൻ ഇസ്രോ ഇതുവരെ ഉപയോഗിച്ചിരുന്നത് പിഎസ്എൽവി റോക്കറ്റുകളാണ്.
LVM3 – M2/OneWeb India-1 Mission: Launch scheduled at 0007 hrs. IST on October 23, 2022. Cryo stage, equipment bay (EB) assembly completed. Satellites are encapsulated and assembled in the vehicle. Final vehicle checks are in progress. @NSIL_India @OneWeb pic.twitter.com/pPbqjDjFmS
— ISRO (@isro) October 14, 2022
വൺവെബ്, ഐഎസ്ആർഒയുടെ വാണിജ്യ വിഭാഗമായ ന്യൂസ്പേസ് ഇന്ത്യാ ലിമിറ്റഡുമായി (എൻഎസ്ഐഎൽ) കൈകോർത്താണ് വിക്ഷേപണം സാധ്യമാക്കുന്നത്. കമ്പനിയുടെ 14-ാമത് ലോഞ്ച് ആയിരിക്കും ഇത്. ഐഎസ്ആർഒയുടെ ഏറ്റവും ഭാരമേറിയ റോക്കറ്റായ ജിഎസ്എൽവി എംകെ3 ആയിരിക്കും ഉപഗ്രഹങ്ങളെ ഭ്രമണപഥത്തിൽ എത്തിക്കുക. ബഹിരാകാശത്തു നിന്ന് ബ്രോഡ്ബാൻഡ് സേവനം രാജ്യത്ത് നൽകുന്നതിനായി കഴിഞ്ഞ ഏപ്രിൽ മാസത്തിൽ ടെലികോം വകുപ്പ് വൺവെബ്ബിന് താൽപ്പര്യപത്രം സമർപ്പിച്ചിരുന്നു. പിന്നീട് ന്യൂസ്പേസ് ഇന്ത്യാ ലിമിറ്റഡുമായി കമ്പനി കൈകോർത്തതോടെയാണ് പുതിയ സേവനം ആരംഭിക്കുന്നത്.
