ലഖ്നൗ: ഭഗവാൻ ശ്രീരാമന്റെ വനവാസ പാതകൾ ആലേഖനം ചെയ്ത പോസ്റ്റൽ കവറുകൾ പുറത്തിറക്കി ഉത്തർ പ്രദേശ് മുഖ്യമന്ത്രി യോഗി ആദിത്യനാഥ്. പന്ത്രണ്ടാമത് സംസ്ഥാനതല സ്റ്റാമ്പ് ശേഖരണ പ്രദർശനം ഉദ്ഘാടനം ചെയ്യുന്നതിന്റെ ഭാഗമായാണ് കവറുകൾ പുറത്തിറക്കിയത്. അയോദ്ധ്യ മുതൽ ചിത്രകൂടം വരെയുള്ള ശ്രീരാമന്റെ വനവാസ പാതയിലെ 14 സ്ഥലങ്ങളാണ് സ്റ്റാമ്പിൽ ഉൾപ്പെടുത്തിയിരിക്കുന്നത്.
അയോദ്ധ്യ, തമസാ നദീതീരം, സൂര്യകുണ്ഡ്, സീതാകുണ്ഡ്, ദേവഘട്ട്, ശൃംഗ്വേർപൂർ, രാം ജോയിത, മഹർഷി ഭരദ്വാജാശ്രമം, പ്രയാഗ് രാജ്, സീതാ കുന്ന്, മഹർഷി വാത്മീകി ആശ്രമം, കാമദ്ഗിരി, രാംശായിയ, ചിത്രകൂടം എന്നീ സ്ഥലങ്ങളാണ് കവറുകളിൽ ഉൾപ്പെടുത്തിയിരിക്കുന്നത്.
ഇന്ത്യയുടെ പുരോഗതിയിലും സംസ്കാരത്തിലും പൈതൃകത്തിലും ഉത്തർ പ്രദേശിന് സവിശേഷമായ സ്ഥാനമുണ്ടെന്ന് യോഗി ആദിത്യനാഥ് പറഞ്ഞു. സ്റ്റാമ്പുകളിലൂടെയും പോസ്റ്റൽ കവറുകളിലൂടെയും ഈ സ്ഥലങ്ങളുടെ പ്രാധാന്യം വരും തലമുറയിലേക്ക് പകർന്നു നൽകാൻ പോസ്റ്റൽ വകുപ്പ് നടത്തുന്ന പരിശ്രമങ്ങൾ അഭിനന്ദനാർഹമാണെന്നും യോഗി ആദിത്യനാഥ് പറഞ്ഞു. സ്റ്റാമ്പ് ശേഖരണം എന്ന ഒഴിവുസമയ വിനോദത്തിന്റെ പ്രാധാന്യത്തെ കുറിച്ചും ചടങ്ങിൽ അദ്ദേഹം വിശദീകരിച്ചു.
