മലപ്പുറം: ഫ്രഷേഴ്സ് ഡേ ആഘോഷത്തിന്റെ ഭാഗമായി കോളേജിൽ സംഘടിപ്പിച്ച ഡിജെ പാർട്ടിക്കിടെ മലപ്പുറത്ത് പെൺകുട്ടികൾ കുഴഞ്ഞു വീണു. മഞ്ചേരി കോ- ഓപ്പറേറ്റീവ് കോളേജിലെ ഡിജെ പാർട്ടിക്കിടെ ശനിയാഴ്ചയായിരുന്നു സംഭവം. 10 വിദ്യാർത്ഥിനികളാണ് കുഴഞ്ഞു വീണത്.
വിദ്യാർത്ഥികൾ കൂട്ടം ചേർന്ന് പാട്ടുവെച്ച് നൃത്തം ചെയ്യുന്നതിനിടെയാണ് പെട്ടെന്ന് പെൺകുട്ടികൾ കുഴഞ്ഞു വീണത്. പത്തൊൻപത്- ഇരുപത് വയസ്സുള്ള പെൺകുട്ടികളാണ് കുഴഞ്ഞു വീണത്. ഇത്രയും കുട്ടികൾ ഒരുമിച്ച് കുഴഞ്ഞു വീണതോടെ കോളേജ് അധികൃതരും പരിഭ്രാന്തരായി. തുടർന്ന് കുട്ടികളെ ആശുപത്രിയിൽ പ്രവേശിപ്പിച്ചു.
ആശുപത്രിയിൽ പ്രവേശിപ്പിച്ച കുട്ടികളുടെ രക്തപരിശോധന നടത്തി. ടാർപോളിൻ ഉപയോഗിച്ച് താത്കാലികമായി തയ്യാറാക്കിയ ഇടത്തായിരുന്നു പാർട്ടി നടത്തിയത്. ചൂടും അമിതമായ ശബ്ദവുമാണ് കുട്ടികൾക്ക് അസ്വസ്ഥത ഉണ്ടാക്കിയത് എന്നാണ് പ്രാധമിക നിഗമനം. നിലവിൽ കുട്ടികളുടെ ആരോഗ്യനില തൃപ്തികരമാണ് എന്നാണ് കോളേജ് അധികൃതർ നൽകുന്ന വിവരം.
Comments