കണ്ണൂർ: കുരങ്ങ് വീട് തകർത്തതിൽ പ്രതിഷേധിച്ച് മരത്തിന് മുകളിൽ കയറി ആത്മഹത്യാഭീഷണി മുഴക്കി കർഷകൻ. കണിച്ചാറിലാണ് നാട്ടുകാരെ മുൾമുനയിലാക്കിയ സംഭവം ഉണ്ടായത്. ഒടുവിൽ പഞ്ചായത്ത് പ്രസിഡന്റും വനം വകുപ്പ് ഉദ്യോഗസ്ഥരുമെത്തിയായിരുന്നു ഏലപീടിക സ്വദേശി സ്റ്റാൻലിയെ താഴെയിറക്കിയത്. കുരങ്ങ് ശല്യത്തിന് പരിഹാരം കാണാമെന്ന് സ്റ്റാൻലിയ്‌ക്ക് പഞ്ചായത്ത് പ്രസിഡന്റും വനംവകുപ്പും ഉറപ്പ് നൽകി.
ഇന്ന് രാവിലെയായിരുന്നു സ്റ്റാൻലി പെട്രോളുമായി മരത്തിനു മുകളിൽ കയറി ആത്മഹത്യ ഭീഷണി മുഴക്കിയത്. വാനരക്കൂട്ടം കഴിഞ്ഞദിവസം സ്റ്റാൻലിയുടെ വീട് അടിച്ചുതകർത്തിരുന്നു. ഇതിന് പിന്നാലെയായിരുന്നു മരത്തിന് മുകളിൽ കയറി സ്റ്റാൻലി ആത്മഹത്യാ ഭീഷണി മുഴക്കിയത്. ഏറെ നേരത്തെ ശ്രമത്തിനൊടുവിലായിരുന്നു സ്റ്റാൻലിയെ മരത്തിന് താഴെയിറക്കിയത്. സ്റ്റാൻലിയെ രക്ഷിക്കാൻ ഫയർഫോഴ്‌സ് ഉൾപ്പെടെ സ്ഥലത്ത് എത്തിയിരുന്നു.
തന്റെ വസ്തു വനം വകുപ്പ് കയ്യേറിയെന്ന പരാതിയും സ്റ്റാൻലി ഉയർത്തുന്നുണ്ട്. ഇത് പരിശോധിക്കുമെന്നും കണിച്ചാർ പഞ്ചായത്ത് പ്രസിഡന്റ് ആന്റണി സെബാസ്റ്റ്യൻ ഉറപ്പു നൽകി.
