ഗാന്ധിനഗർ: മഹാത്മാഗാന്ധിക്ക് ശേഷം രാജ്യത്തിന്റെ സ്പന്ദനം മനസ്സിലാക്കുന്ന രണ്ടാമത്തെ നേതാവ് പ്രധാനമന്ത്രി നരേന്ദ്ര മോദിയാണെന്ന് പ്രതിരോധ മന്ത്രി രാജ്നാഥ് സിംഗ്. ‘മോദി@20: ഡ്രീംസ് മീറ്റ് ഡെലിവറി’ എന്ന പുസ്തകത്തിന്റെ ഗുജറാത്തി പതിപ്പ് പ്രകാശനം ചെയ്യവേയാണ് മന്ത്രി ഇക്കാര്യം വ്യക്തമാക്കിയത്. പ്രധാനമന്ത്രിയുടെ ധീരമായ തീരുമാനങ്ങളും ഭരണവും പാവങ്ങൾക്കായി നൽകുന്ന സേവനങ്ങളും ലോകരാജ്യങ്ങളിൽ ഇന്ത്യയ്ക്ക് വലിയ സ്ഥാനം നൽകിയെന്നും അദ്ദേഹം പറഞ്ഞു. വർത്തമാനകാലത്തെ മാറ്റുന്നതിനൊപ്പം രാജ്യത്തിന്റെ ഭാവിയെ രൂപപ്പെടുത്താനുള്ള തന്റെ കാഴ്ചപ്പാടിൽ ശ്രദ്ധ കേന്ദ്രീകരിക്കാനും പ്രധാനമന്ത്രി കഠിനാധ്വാനം ചെയ്യുന്നുണ്ടെന്നും അദ്ദേഹം കൂട്ടിച്ചേർത്തു.
യഥാർത്ഥ നേതാവാണ് നരേന്ദ്രമോദി എന്നാണ് ഗുജറാത്ത് മുഖ്യമന്ത്രി പട്ടേൽ പ്രശംസിച്ചത്.മോദിയുടെ നേതൃത്വത്തിലുള്ള നയങ്ങളും സംരംഭങ്ങളുടെയും ഫലമായി ഗുജറാത്ത് നിരവധി വികസന ലക്ഷ്യങ്ങൾ നേടിയെന്നും അദ്ദേഹം പറഞ്ഞു. പുസ്തകത്തിന്റെ ഗുജറാത്തി പതിപ്പ് പ്രധാനമന്ത്രിയുടെ കാഴ്ചപ്പാട് നന്നായി മനസ്സിലാക്കാൻ സഹായിക്കുമെന്ന് കേന്ദ്ര വാർത്താവിതരണ പ്രക്ഷേപണ സഹമന്ത്രി എൽ.മുരുകൻ പറഞ്ഞു. രാജ്യത്തെ ജനങ്ങൾക്ക് പ്രയോജനകരമായ നിരവധി ജനപക്ഷ നയങ്ങളും തീരുമാനങ്ങളും മോദി എടുത്തിട്ടുണ്ടെന്നും രാജ്യത്തിന്റെ പുരോഗതിയ്ക്കായി അദ്ദേഹം പ്രവർത്തിക്കുന്നതായും അദ്ദേഹം കൂട്ടിച്ചേർത്തു.
ബ്ലൂക്രാഫ്റ്റ് ഡിജിറ്റൽ ഫൗണ്ടേഷൻ ഇംഗ്ലീഷിൽ പുറത്തിറക്കിയ ഈ പുസ്തകത്തിന്റെ ഗുജറാത്തി പതിപ്പ് നവഭാരത് പബ്ലിക്കേഷൻസാണ് പ്രസിദ്ധീകരിച്ചത്. 20 വർഷത്തെ ഔദ്യോഗിക ജീവിതത്തിൽ പ്രധാനമന്ത്രി മോദി നയിച്ച ഭരണത്തിന്റെ യഥാർത്ഥ വിവരണമാണ് മോദി@20: ഡ്രീംസ് മീറ്റ് ഡെലിവറി എന്നും അദ്ദേഹം വ്യക്തമാക്കി. ചടങ്ങിൽ ഗുജറാത്ത് സർക്കാരിലെ മന്ത്രിമാർ, മുതിർന്ന ഉദ്യോഗസ്ഥർ, എഴുത്തുകാർ, കവികൾ, എഡിറ്റർമാർ, സംസ്ഥാനത്തെ കലാ സാംസ്കാരിക രംഗത്തെ പ്രതിനിധികൾ എന്നിവർ പങ്കെടുത്തു.
Comments