രാഹുൽ ഗാന്ധി നയിക്കുന്ന കോൺഗ്രസിന്റെ ഭാരത് ജോഡോ യാത്ര കർണാടകയിലെ ബെല്ലാരിയിലെത്തിയിരിക്കുകയാണ്. യാത്രയ്ക്കിടെ പ്രവർത്തകരുമായി രാഹുൽ നടത്തിയ സൗഹൃദ സംഭാഷണത്തിൽ ഒരാളുടെ രസകരമായ ചോദ്യമാണ് സമൂഹമാദ്ധ്യമങ്ങളിൽ ചിരി പടർത്തിയിരിക്കുന്നത്.
ഏത് സൺസ്ക്രീനാണ് ഉപയോഗിക്കുന്നത്? ഭാരത് ജോഡാ യാത്രയ്ക്കിടെ രാഹുൽ ഗാന്ധിയോട് ഒരു പ്രവർത്തകന്റെ ചോദ്യം ഇതായിരുന്നു. അമ്മ ഒരു സൺസ്ക്രീൻ അയച്ച് തന്നിട്ടുണ്ടെന്നും പക്ഷേ താൻ അത് ഉപയോഗിക്കുന്നില്ലെന്നായിരുന്നു അദ്ദേഹത്തിന്റെ മറുപടി. രാഹുലിന്റെ മറുപടിയ്ക്ക് പ്രതികരണവുമായി മറ്റൊരാളെത്തി, എന്നാൽ നിങ്ങളുടെ മുഖം സൂര്യപ്രകാശമാണെന്നും അത് പ്രകാശിച്ചുകൊണ്ടിരിക്കുന്നുവെന്നും അയാൾ പ്രശംസിച്ചു.
Mr @RahulGandhi :
I don’t use sunscreen…
मेरी माँ ने मेरे लिए Sunscreen भेजी है लेकिन मैं इस्तेमाल नही करता pic.twitter.com/VTNTWHLHiZ
— Supriya Bhardwaj (@Supriya23bh) October 17, 2022
ഭാരത് ജോഡോ യാത്രയിലെ രസകരമായ നിരവധി സംഭവങ്ങളുടെ ചിത്രങ്ങൾ പുറത്ത് വന്നിരുന്നു. ഇതിന് പിന്നാലെയാണ് പുതിയ വീഡിയോയും. സിദ്ധരാമയ്യയ്ക്കും ഡികെ ശിവകുമാറിനുമൊപ്പം ഓടുന്ന രാഹുൽ ഗാന്ധി മുതൽ അമ്മ സോണിയാ ഗാന്ധിയുടെ ഷൂ ലെയ്സ് കെട്ടുന്നത് വരെയുള്ള നിരവധി വൈറൽ നിമിഷങ്ങൾ ഭാരത് ജോഡോ യാത്രയ്ക്കിടെ പുറത്തുവന്നിട്ടുണ്ട്. ഒരു കുട്ടിയുമായി റോഡിൽ പുഷ്അപ്പ് ചെയ്യുന്ന വീഡിയോയും പുറത്തുവന്നിരുന്നു.
തമിഴ്നാട്, കേരളം, കർണാടക, ആന്ധ്രാപ്രദേശ് എന്നീ നാല് സംസ്ഥാനങ്ങളിലൂടെ കടന്നുപോയ ഭാരത് ജോഡോ യാത്ര സെപ്റ്റംബർ 7 മുതൽ കന്യാകുമാരിയിൽ നിന്നാണ് ആരംഭിച്ചത്. കശ്മീരിലെ ശ്രീനഗറിലാണ് യാത്ര സമാപിക്കുക.
