ന്യൂഡൽഹി: മുതിർന്ന ഐസിഎഎസ് ഓഫീസർ ഭാരതി ദാസിനെ കൺട്രോളർ ജനറൽ ഓഫ് അക്കൗണ്ട്സ് ആയി നിയമിച്ചു. ധനമന്ത്രാലയത്തിന് കീഴിലുളള എക്സ്പെൻഡിച്ചർ ഡിപ്പാർട്ട്മെന്റിലേക്കാണ് നിയമനം.
കേന്ദ്രസർക്കാരിന് വരവ് ചെലവ് കണക്കുകളുമായി ബന്ധപ്പെട്ട മാർഗനിർദ്ദേശങ്ങൾ നൽകുന്ന മുഖ്യ ഉപദേഷ്ടാവാണ് കൺട്രോളർ ജനറൽ ഓഫ് അക്കൗണ്ട്സ്.1988 ബാച്ച് ഇന്ത്യൻ സിവിൽ അക്കൗണ്ട്സ് സർവ്വീസ് ഓഫീസറാണ് ഭാരതി ദാസ്. സെൻട്രൽ ബോർഡ് ഓഫ് ഡയറക്ട് ടാക്സസിലും വിദേശകാര്യമന്ത്രാലയത്തിലും ആഭ്യന്തരമന്ത്രാലയത്തിലും പ്രിൻസിപ്പൽ ചീഫ് കൺട്രോളർ ഓഫ് അക്കൗണ്ട്സ് ആയി സേവനമനുഷ്ഠിച്ചിട്ടുണ്ട്.
കേന്ദ്ര കുടുംബ ആരോഗ്യ ക്ഷേമ മന്ത്രാലയം, ചീഫ് കൺട്രോളർ ഓഫ് അക്കൗണ്ട്സ്, സിവിൽ ഏവിയേഷൻ മന്ത്രാലയം ഡയറക്ടർ, കേന്ദ്ര റോഡ് ഗതാഗത ഹൈവേ മന്ത്രാലയത്തിലും ഷിപ്പിംഗ് മന്ത്രാലയത്തിലും ഡെപ്യൂട്ടി സെക്രട്ടറി തുടങ്ങിയ പദവികളും വഹിച്ചിട്ടുണ്ട്.
