ഏറെ ആരാധകരുള്ള ബോളിവുഡ് നടിയാണ് ആലിയ ഭട്ട്. നടൻ രൺബീർ കപൂറിന്റെയും ആലിയ ഭട്ടിന്റെയും വിവാഹം സിനിമാ ലോകവും ആരാധകരും വലിയ ആഘോഷമാക്കിയിരുന്നു. താരം ഇപ്പോൾ ഗർഭിണിയാണ്. നിറവയറുമായുള്ള താരത്തിന്റെ പ്രസംഗമാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. ഒക്ടോബർ 2-ന് നാഗ്പൂരിൽ നടന്ന പരിപാടിയിൽ ടൈം100 ഇംപാക്ട് അവാർഡ് നടി സ്വന്തമാക്കിയിരുന്നു. ശേഷം നടത്തിയ പ്രസംഗത്തിനിടെയാണ് കുഞ്ഞ് വയറിൽ ചവിട്ടുന്നുണ്ടെന്ന് താരം വെളിപ്പെടുത്തിയത്.
തന്നെ സഹിക്കുന്നതിനും പിന്തുണ നൽകുന്നതിനും ഭർത്താവായ രൺബീർ കപൂറിനും കുടുംബത്തിനും പ്രസംഗത്തിൽ ആലിയ ഭട്ട് നന്ദി പറഞ്ഞു. നേരത്തെ, ടൈം100 ഇംപാക്ട് അവാർഡ് നടി ദീപിക പദുക്കോണിനും ലഭിച്ചിരുന്നു. ’10 വർഷം മുമ്പ് ഞാൻ ജോലി ചെയ്യാൻ തുടങ്ങിയപ്പോൾ, എന്റെ ചിന്ത എങ്ങനെ ലോകത്തിന് മുന്നിൽ അറിയപ്പെടും എന്നായിരുന്നു. അതിനായി ഞാൻ കഠിനാധ്വാനം ചെയ്തു. ലോകം തന്നെ തിരിച്ചറിയണമെന്ന് വളരെയധികം ആഗ്രഹിച്ചു’ എന്ന് ആലിയ ഭട്ട് വേദിയിൽ പറഞ്ഞു.
‘ഞാൻ പറയുന്നത് ക്ഷമയോടെ ശ്രദ്ധിക്കുന്നതിന് എല്ലാവരോടും സ്നേഹമുണ്ട്. എന്റെ കുടുംബത്തിനും, ഈ ഭൂമിയിൽ എനിക്കൊരു ജന്മം നൽകിയ അമ്മയ്‌ക്കും അച്ഛനും നന്ദി. സ്നേഹം നൽകുന്ന സഹോദരിയോടും നന്ദി പറയുന്നു. എന്റെ ഓരോ വാക്കുകളെയും വാശികളെയും സഹിഷ്ണുതയോട് സ്വീകരിച്ച് എനിക്കൊപ്പം നിൽക്കുന്ന എന്റെ ഭർത്താവായ രൺബീർ കപൂറിന് പ്രത്യേക അവാർഡ് നൽകണം’ എന്നും പ്രസംഗത്തിൽ ആലിയ ഭട്ട് പറഞ്ഞു. പ്രസംഗത്തിനിടെ ഓരോ നിമിഷവും തന്റെ കുഞ്ഞ് അനങ്ങുന്നുണ്ടെന്നും ചവിട്ടുന്നുണ്ടെന്നുമുളള ആലിയയുടെ വാക്കുകൾ സദസ്സും സന്തോഷത്തോടെയാണ് ശ്രവിച്ചത്.
