ഹൈദരാബാദ്;വയനാട് എംപി രാഹുൽ ഗാന്ധി നയിക്കുന്ന കോൺഗ്രസ് ജോഡോ യാത്രയ്ക്ക് സ്വാഗതമേകി എസ്എഫ്ഐ. കർണൂലിലെ അധോണി മണ്ഡലത്തിൽ വെച്ചാണ് എസ്എഫ്ഐ നേതാക്കൾ സ്വീകരണം നൽകിയത്. എസ്എഫ്ഐ അധോണി ഏരിയ കമ്മറ്റി നേതാക്കളാണ് യാത്രയെ സ്വീകരിക്കാൻ നേതൃത്വം നൽകിയത്.
ദേശീയ തലത്തിൽ ബിജെപിക്കെതിരെയുള്ള പോരാട്ടം നയിക്കാൻ രാഹുൽ ഗാന്ധിക്ക് കഴിയുമെന്ന് എസ്എഫ്ഐ നേതാക്കൾ പറഞ്ഞുവെന്ന് കേരളത്തിൽ നിന്നുള്ള യാത്ര പദയാത്രികൻ ജി മഞ്ജുക്കുട്ടൻ വ്യക്തമാക്കി. സംസ്ഥാനത്തിന്റെ വികസനത്തെ കുറിച്ച് നിവേദനവും എസ്എഫ്ഐ നേതാക്കൾ രാഹുൽ ഗാന്ധിക്ക് കൈമാറിയെന്നും മഞ്ജുക്കുട്ടൻ കൂട്ടിച്ചേർത്തു.
എസ്എഫ്ഐയുടെ കേരള ഘടകത്തിന്റെ നിലപാടുകളെ തള്ളുന്നതാണ് ആന്ധ്രയിലെ ഈ സ്വീകരണം. കോൺഗ്രസ് സീറ്റ് ജോഡോ യാത്രയെന്നായിരുന്നു എസ്എഫ്ഐ സംസ്ഥാന സെക്രട്ടറി ആർഷോ രാഹുലിന്റെ യാത്രയെ പരിഹസിച്ചത്. കാരവനിൽ വിശ്രമ യാത്ര നടത്തുന്ന രാഹുൽ ഗാന്ധിക്കും കോൺഗ്രസിനും എസ്എഫ്ഐയെ കണ്ട് പഠിക്കാവുന്നതാണെന്നും ആർഷോ പറഞ്ഞിരുന്നു.ഇതിന് പിന്നാലെയാണ് അധോണിയിൽ എസ്എഫ്ഐയുടെ നേതൃത്വത്തിൽ ഗംഭീര സ്വീകരണമൊരുക്കിയത്.
