ഇസ്ലാമാബാദ്: 2023ൽ പാകിസ്താനിൽ നടക്കാനിരിക്കുന്ന ഏഷ്യാ കപ്പിനെതിരെ ഇന്ത്യ നിലപാടെടുത്താൽ, ഇന്ത്യയിൽ നടക്കുന്ന ഏകദിന ലോകകപ്പ് മാത്രമല്ല, ഇപ്പോൾ നടക്കുന്ന ട്വന്റി 20 ലോകകപ്പിലെ ഇന്ത്യക്കെതിരായ മത്സരവും ബഹിഷ്കരിക്കണമെന്ന് പാകിസ്താൻ ക്രിക്കറ്റ് ടീമിനോട്, മുൻ പാക് വിക്കറ്റ് കീപ്പർ കമ്രാൻ അക്മൽ.
2023 ഏഷ്യാ കപ്പ് ക്രിക്കറ്റ് പാകിസ്താനിലാണ് നടക്കുന്നതെങ്കിൽ, ടൂർണമെന്റിൽ ഇന്ത്യ പങ്കെടുക്കില്ലെന്ന് ബിസിസിഐ സെക്രട്ടറി ജയ് ഷാ വ്യക്തമാക്കിയിരുന്നു. 2023 ഏഷ്യാ കപ്പ് ഒരു നിഷ്പക്ഷ വേദിയിലായിരിക്കുമെന്നും, പാകിസ്താനിലായിരിക്കില്ലെന്നും ജയ് ഷാ സൂചന നൽകിയിരുന്നു. ഇതിനെതിരെയാണ്, പാകിസ്താൻ ഇന്ത്യയിൽ നടക്കുന്ന ഏകദിന ലോകകപ്പ് ബഹിഷ്കരിക്കുമെന്ന് ഭീഷണി മുഴക്കിയത്.
ജയ് ഷായുടെ പ്രസ്താവന അപ്രതീക്ഷിതമാണ് എന്നായിരുന്നു കമ്രാൻ അക്മലിന്റെ പ്രതികരണം. ഏഷ്യാ കപ്പ് പാകിസ്താനിൽ നിന്ന് മാറ്റിയാൽ, ഇന്ത്യയുമായി ഐസിസി മത്സരങ്ങളോ, ഏഷ്യൻ ക്രിക്കറ്റ് കൗൺസിൽ സംഘടിപ്പിക്കുന്ന മത്സരങ്ങളോ പാകിസ്താൻ ടീം കളിക്കാൻ പാടില്ലെന്നും അക്മൽ പറഞ്ഞു.
അതേസമയം, ട്വന്റി 20 ലോകകപ്പിലെ സുപ്രധാന മത്സരത്തിൽ ഞായറാഴ്ച മെൽബണിൽ പരസ്പരം കൊമ്പു കോർക്കാൻ ഒരുങ്ങുകയാണ് ഇന്ത്യയും പാകിസ്താനും. 23ന് നടക്കാനിരിക്കുന്ന മത്സരത്തിന് മഴ ഭീഷണി ഉയർത്തുന്നത് ആരാധകരെ നിരാശരാക്കുന്നുണ്ട്.
