ഫേസ്ബുക്ക് വ്യാജന്മാരെ ജാഗ്രതെെ!!.. നിങ്ങളെ കണ്ടെത്താൻ പലതുണ്ട് വഴികൾ

ഇന്ന് ലോകത്താകമാനമുള്ള ഭൂരിഭാഗം ആളുകളും ഉപയോഗിക്കുന്ന സമൂഹമാദ്ധ്യമാണ് ഫേസ്ബുക്ക്. ഒരു അക്കൗണ്ട് ഉണ്ടാക്കുന്നത് വളരെ എളുപ്പമുള്ള കാര്യമായത് കൊണ്ടു തന്നെ ഒരുപാട് വ്യാജന്മാരും ഫേസ്ബുക്കിലുണ്ട്. അത്തരം വ്യാജന്മാരെ കുഞ്ഞുപണികളും വലിയ പണികളും ഒക്കെ വാങ്ങിക്കൂട്ടിയവർ നമ്മുടെ കൂട്ടത്തിലുമുണ്ടാവും. പണം തട്ടുന്നത് മുതൽ സ്വകാര്യ ജീവിതത്തിലേക്ക് വരെ വ്യാജന്മാർ കടന്ന് കയറുന്നു. വ്യാജന്മാരെ തിരിച്ചറിയാൻ കഴിയാതെ പോവുന്നതാണ് പല കേസുകളിലും അബദ്ധം പറ്റുന്നതിന് കാരണമാകുന്നത്.

ഫേസ്ബുക്കിലെ വ്യാജന്മാരെ കണ്ടെത്തുന്നതിന് ചില ടിപ്പുകൾ നോക്കിയാലോ?

പ്രൊഫൈൽ പിക്ച്ചർ

ഫേസ്ബുക്കിൽ പരിചയമില്ലാത്ത ആളുടെ റിക്വസ്റ്റ് വന്നാൽ ആദ്യം പ്രൊഫൈൽ പിക് പരിശോധിക്കുക. പ്രൊഫൈൽ ഫോട്ടോസ് ആൽബത്തിലുള്ള ഫോട്ടോകളെല്ലാം ഒരാളുടേത് തന്നെയാണോ ന്നെ് നോക്കുക. കൂടുതലും സിനിമ നടന്മാരുടേയോ നടിമാരുടേയോ പൂവുകളോ മറ്റോ ആണെങ്കിൽ സൂക്ഷിക്കുക. ഒരു ഫോട്ടോ തന്നെ വർഷങ്ങളായി പ്രൊഫൈൽ ഫോട്ടോയായി ഉപയോഗിക്കുന്നുണ്ട് എങ്കിൽ അത്തരം അക്കൗണ്ടുകളെയും സൂക്ഷിക്കുക.മോഡലുകളുടെയും മറ്റും ഫോട്ടോയാണ് പ്രൊഫൈലിൽ ഉള്ളതെങ്കിൽ ഇത് തിരിച്ചറിയാൻ എളുപ്പാണ്. പ്രൊഫൈൽ ഫോട്ടോ നിങ്ങളുടെ ഡിവൈസിലേക്ക് സേവ് ചെയ്തതശേഷം ഗൂഗിളിൽ ആ ഇമേജ് സെർച്ച് ചെയ്താൽ മതി. ഏതെങ്കിലും വെബ്‌സൈറ്റിൽ നിന്നും എടുത്ത ഫോട്ടോയാണ് അതെങ്കിൽ വിശദമായ വിവരങ്ങൾ ലഭിക്കും.

ഫ്രണ്ട്‌സ് ലിസ്റ്റ് പരിശോധിക്കാം

ഉദാഹരണത്തിന് കോഴിക്കോട് സ്ഥിരതാമസം എന്ന് പറയുന്ന ഒരു ആളുടെ പ്രൊഫൈലിൽ കൂടുതലും നോർത്ത് ഇന്ത്യയിലെയും മറ്റ് സുഹൃത്തുക്കളാണെങ്കിൽ അത് വ്യാജമാകാനുള്ള സാധ്യതയുണ്ട്.അതാത് പ്രദേശങ്ങളിൽ താമസിക്കുന്ന കുറച്ച് സുഹൃത്തുക്കളെങ്കിലും ഓരോ ഒറിജനൽ അക്കൗണ്ടിലും ഉണ്ടായിരിക്കും. ഇത്തരത്തിൽ ഒരു ബന്ധവും ഇല്ലാത്ത സ്ഥലത്തെ സുഹൃത്തുക്കൾ ഉണ്ടെങ്കിൽ ആ അക്കൗണ്ട് തീർച്ചയായും വ്യാജമായിരിക്കും.

എബൗട്ട് സെക്ഷൻ

ഫേസ്ബുക്കിന്റെ എബൗട്ട് വിവരങ്ങളെല്ലാം കൃത്യമായി പൂരിപ്പിച്ച് നൽകാൻ ഫേക്ക് അക്കൗണ്ട് ഉണ്ടാക്കുന്നവർ തയ്യാറാകില്ല. എബൗട്ടിൽ ആശയക്കുഴപ്പമുണ്ടാക്കുന്ന വിവരങ്ങളാണെങ്കിൽ സൂക്ഷിക്കുക.

പ്രൊഫൈൽ യുആർഎൽ പരിശോധിക്കാം

വ്യാജ പ്രൊഫൈലിലുള്ള പേരും URLൽ ഉള്ള പേരും രണ്ടായിരിക്കും. ഇത്തരം അവസരങ്ങളിൽ ചിലപ്പോൾ ആരുടെയെങ്കിലും പ്രൊഫൈൽ ഹാക്ക് ചെയ്ത് അത് പേര് മാറ്റി ഉപയോഗിക്കുന്നത് പോലും ആയിരിക്കാം.

ടൈം ലൈൻ

വ്യത്യസ്തങ്ങളായ പോസ്റ്റുകൾ ടൈം ലൈനിൽ കാണുന്നില്ലെങ്കിൽ അത് മിക്കവാറും വ്യാജ പ്രൊഫൈൽ ആയിരിക്കും.

ഈ പറഞ്ഞ വഴികളിലൂടെ മാത്രം വ്യാജ പ്രൊഫൈൽ കണ്ടെത്താനായെന്ന് വരില്ല. ചില ആളുകൾ തങ്ങളുടെ ഫേസ്ബുക്കിൽ അധികം കാര്യങ്ങളൊന്നും ഷെയർ ചെയ്യണം എന്നില്ല. ഇത്തരം ആളുകളുടെ പ്രൊഫൈൽ വ്യാജമാണെന്ന് തെറ്റിദ്ധരിക്കാനുള്ള സാധ്യത കൂടുതലാണ്.