കൊച്ചി: ബലാത്സംഗക്കേസിൽ പ്രതിയായതോടെ ഒളിവിൽ പോയ എംഎൽഎ എൽദോസ് കുന്നപ്പിള്ളി ഇന്ന് സ്വന്തം മണ്ഡലമായ പെരുമ്പാവൂരിൽ എത്തിയേക്കും. പീഡനക്കേസിൽ കോഴിക്കോട് അഡീഷണൽ സെഷൻസ് കോടതി മുൻകൂർ ജാമ്യം നൽകിയതോടെ ഇന്ന് തന്നെ മണ്ഡലത്തിലേക്ക് തിരിച്ചെത്താനാണ് നീക്കമെന്നാണ് സൂചന. കോടതി നിർദേശപ്രകാരം നാളെയാണ് അന്വേഷണ ഉദ്യോഗസ്ഥർക്ക് മുമ്പിൽ എൽദോസ് ഹാജരാകേണ്ടത്.
അതേസമയം എൽദോസിനെതിരായ നടപടിയിൽ കെപിസിസി തീരുമാനം ഇന്നുണ്ടായേക്കും. താൻ നിരപരാധിയാണെന്നും കള്ളക്കേസിൽ കുടുക്കിയതാണെന്നുമാണ് എൽദോസ് പാർട്ടിക്ക് നൽകിയിരിക്കുന്ന വിശദീകരണം. എന്നാൽ പരാതിക്ക് പിന്നാലെ ഒളിവിൽ പോയ എംഎൽഎയുടെ നടപടിയിൽ കടുത്ത അമർഷത്തിലാണ് നേതാക്കൾ.
പെരുമ്പാവൂരിലെ എംഎൽഎ ഓഫീസിൽ എത്താതെയും മണ്ഡലത്തിലെ പരിപാടികളിൽ ഒന്നും തന്നെ പങ്കെടുക്കാതെയും ഫോൺ നമ്പറുകൾ സ്വിച്ച് ഓഫ് ചെയ്തും കഴിഞ്ഞ അഞ്ച് ദിവസമായി ഒളിവിലാണ് എൽദോസ് കുന്നപ്പിള്ളി. യുവതിയുടെ പരാതി വിവാദമായതോടെ പുറംലോകത്തേക്ക് വരാതെ ഫേസ്ബുക്കിലൂടെ പ്രതികരണമറിയിക്കുകയാണ് എംഎൽഎ ചെയ്തത്. പരാതിക്കാരി ക്രിമിനൽ ആണെന്നും തനിക്ക് തട്ടിപ്പ് വശമില്ലെന്നുമാണ് എൽദോസിന്റെ നിലപാട്.
Comments