ഡൽഹി: പത്ത് ലക്ഷം യുവാക്കൾക്ക് തൊഴിൽ നൽകുന്ന ‘റോസ്ഗർ മേള’യ്‌ക്ക് ഇന്ന് തുടക്കം. ഇന്ത്യയിലെ ഏറ്റവും വലിയ തൊഴിൽ മേള ഇന്ന് പ്രധാനമന്ത്രി ഉദ്ഘാടനം ചെയ്യും. രാവിലെ 11 മണിയ്‌ക്ക് വീഡിയോ കോൺഫറൻസിലൂടെയാണ് ‘റോസ്ഗർ മേള’യുടെ ഉദ്ഘാടനം നരേന്ദ്രമോദി നിർവ്വഹിക്കുക. ചടങ്ങിൽ 75,000 ഉദ്യോഗാർത്ഥികൾക്ക് തൊഴിൽ അപേക്ഷ നൽകാമെന്ന് പ്രധാനമന്ത്രിയുടെ ഓഫീസ് നേരത്തെ അറിയിച്ചിരുന്നു. രാജ്യത്തെ യുവാക്കൾക്ക് തൊഴിലവസരങ്ങൾ നൽകുന്നതിനും പൗരന്മാരുടെ ക്ഷേമം ഉറപ്പാക്കുന്നതിനുമുള്ള പ്രധാനമന്ത്രിയുടെ പ്രതിബദ്ധത നിറവേറ്റുന്ന സുപ്രധാന ചുവടുവയ്പായിരിക്കും ‘റോസ്ഗർ മേള’ എന്ന് പ്രധാനമന്ത്രിയുടെ ഓഫീസ് വ്യക്തമാക്കി.
ഈ വർഷം ജൂണിൽ വിവിധ സർക്കാർ വകുപ്പുകളോടും മന്ത്രാലയങ്ങളോടും അടുത്ത ഒന്നര വർഷത്തിനുള്ളിൽ 10 ലക്ഷം പേരെ “മിഷൻ മോഡിൽ” റിക്രൂട്ട് ചെയ്യണമെന്ന് പ്രധാനമന്ത്രി നരേന്ദ്രമോദി ആവശ്യപ്പെട്ടിരുന്നു. എല്ലാ സർക്കാർ വകുപ്പുകളിലെയും മന്ത്രാലയങ്ങളിലെയും മാനവ വിഭവശേഷിയുടെ സ്ഥിതി അവലോകനം ചെയ്തതിന് ശേഷമാണ് പ്രധാനമന്ത്രിയുടെ പുതിയ നിർദ്ദേശം. രാജ്യത്തുടനീളമുള്ള പുതിയ നിയമനങ്ങൾ ഇന്ത്യാ ഗവൺമെന്റിന്റെ 38 മന്ത്രാലയങ്ങളിലോ വകുപ്പുകളിലോ ആയിരിക്കും.
കേന്ദ്ര സായുധ സേനാംഗങ്ങൾ, സബ് ഇൻസ്പെക്ടർമാർ, കോൺസ്റ്റബിൾമാർ, എൽഡിസി, സ്റ്റെനോ, പിഎ, ആദായനികുതി ഇൻസ്പെക്ടർമാർ, എംടിഎസ് തുടങ്ങിയ തസ്തികകളിലേക്കാണ് നിയമനം നടക്കുന്നത്. മന്ത്രാലയങ്ങളും വകുപ്പുകളും സ്വയമേവയോ UPSC, SSC, റെയിൽവേ റിക്രൂട്ട്‌മെന്റ് ബോർഡ് തുടങ്ങിയ റിക്രൂട്ടിംഗ് ഏജൻസികൾ വഴിയോ പുതിയ നിയമനങ്ങൾ നടത്തും. വേഗത്തിലുള്ള നിയമനങ്ങൾക്കായി തിരഞ്ഞെടുപ്പ് പ്രക്രിയകൾ ലളിതമാക്കുകയും സാങ്കേതികവിദ്യ പ്രാപ്തമാക്കുകയും ചെയ്തതായി പ്രധാനമന്ത്രിയുടെ ഓഫീസ് അറിയിച്ചു. രാജ്യത്തെ യുവാക്കൾക്കായി മോദി സർക്കാർ ഒന്നും ചെയ്യുന്നില്ല എന്ന പ്രതിപക്ഷ ആരോപണങ്ങളുടെ മുന ഒടിക്കുന്ന പദ്ധതിയാണ് കേന്ദ്രസർക്കാർ മുന്നോട്ട് വെച്ചിരിക്കുന്നത്.
Comments