ഫിഫ അണ്ടർ 17 ലോകകപ്പ് വനിതാ ഫൈനലിക്കേ് പ്രവേശനം നേടി കൊളംബിയ. സെമിയിൽ നൈജീരിയയെ പെനാൽറ്റി ഷൂട്ടൗട്ടിൽ 6-5ന് തോൽപ്പിച്ചാണ് കൊളംബിയ കലാശ കളിക്ക് യോഗ്യത നേടിയത്. ഫിഫ വനിതാ അണ്ടർ 17 ലോകകപ്പിന്റെ ഫൈനലിൽ കടക്കുന്ന ആദ്യ ദക്ഷിണ അമേരിക്കൻ രാജ്യമായി കൊളംബിയ. നെഹ്റു സ്റ്റേഡിയത്തിൽ നടന്ന സെമിഫൈനലിൽ നിശ്ചിത സമയത്ത് ഇരുടീമുകളും ഗോൾരഹിത സമനിലയിൽ പിരിഞ്ഞു.
ഷൂട്ടൗട്ടിൽ ഗബ്രിയേല റോഡ്രിഗസ്, സ്റ്റെഫാനിയ പെർലാസ, മേരി എസ്പിറ്റലെറ്റ, ലിൻഡ കെയ്സെഡോ, ജുവാന ഒർട്ടെഗൺ, നതാലിയ ഹെർണാണ്ടസ് എന്നിവർ കൊളംബിയക്കായി ഗോൾ നേടിയപ്പോൾ മുനോസ് പരാജയപ്പെട്ടു. എഡെറ്റ് ഒഫിയോങ്, എഡിദിയോങ് എറ്റിം, മിറാക്കിൾ ഉസാനി, തായ്വോ അഫോലാബി, ഷകിരത് ഒയിൻലോല എന്നിവർ നൈജീരിയൻ നിരയിൽ ലക്ഷ്യം കണ്ടു. എഡാഫെയുടെ ഷോട്ട് പോസ്റ്റിൽ തട്ടി മടങ്ങി.
ഞായറാഴ്ച മുംബൈയിൽ നടക്കുന്ന ഫൈനൽ പോരാട്ടത്തിൽ ജർമ്മനിയും സ്‌പെയിനും തമ്മിലുള്ള മറ്റൊരു സെമിഫൈനൽ മത്സരത്തിലെ വിജയിയെ കൊളംബിയ നേരിടും.
