ഒരേസമയം 15 പേരുടെ ചിത്രങ്ങൾ വരച്ചു; അവിശ്വസനീയ പ്രകടനവുമായി പെൺകുട്ടി; വൈറൽ വീഡിയോ കണ്ട ആനന്ദ് മഹീന്ദ്ര പ്രതികരിച്ചതിങ്ങനെ..

ന്യൂഡൽഹി: ഒരേസമയം കൊണ്ട് 15 സ്വാതന്ത്ര്യസമര സേനാനികളുടെ ചിത്രം വരച്ചുതീർത്ത് വൈറലായ പെൺകുട്ടിക്ക് സഹായവുമായി വ്യവസായ പ്രമുഖൻ ആനന്ദ് മഹീന്ദ്ര.

How is this even possible?? Clearly she’s a talented artist. But to paint 15 portraits at once is more than art—it’s a miracle! Anyone located near her who can confirm this feat? If valid, she must be encouraged & I’d be pleased to provide a scholarship & other forms of support. pic.twitter.com/5fha3TneJi

— anand mahindra (@anandmahindra) October 27, 2022

അനുഗ്രഹീത കലാകാരിയായ ഈ പെൺകുട്ടി അനൗദ്യോഗികമായി ഗിന്നസ് റെക്കോർഡ് തകർത്തുവെന്നായിരുന്നു വൈറൽ വീഡിയോ കണ്ട ആനന്ദ് മഹീന്ദ്രയുടെ പ്രതികരണം. ”ഇതെങ്ങനെ സാധിക്കുന്നു? തികച്ചും അനുഗ്രഹീതയായ കലാകാരി. ഇത് യഥാർത്ഥത്തിൽ സംഭവിച്ചതാണെങ്കിൽ അവൾ തീർച്ചയായും പ്രോത്സാഹിപ്പിക്കപ്പെടണം. സ്‌കോളർഷിപ്പ് അടക്കമുള്ള സഹായങ്ങൾ എത്തിച്ച് നൽകാൻ ഞാൻ തയ്യാറാണ്” ആനന്ദ് മഹീന്ദ്ര ട്വിറ്ററിലൂടെ പറഞ്ഞു.

മഹാത്മാ ഗാന്ധി, ബിആർ അംബേദ്കർ, ഭഗത് സിംഗ്, രാജേന്ദ്ര പ്രസാദ് തുടങ്ങി 15 വ്യക്തികളെയാണ് പെൺകുട്ടി വരച്ചത്. ഒരേസമയമാണ് 15 ചിത്രങ്ങളും വരച്ചതെന്നാണ് അതിശയിപ്പിക്കുന്ന വസ്തുത. ഇതിനായി മരം കൊണ്ട് തയ്യാറാക്കിയ വടികളിൽ പേനകൾ ഘടിപ്പിച്ചാണ് പെൺകുട്ടി ചിത്രങ്ങൾ വരച്ചത്. ഇവർ ആർട്ടിസ്റ്റ് നൂർജഹാൻ ആണെന്നാണ് റിപ്പോർട്ടുകൾ സൂചിപ്പിക്കുന്നത്.

എന്നാൽ ഈ വീഡിയോ വ്യാജമാണെന്ന് അഭിപ്രായപ്പെട്ടും നിരവധിയാളുകൾ രംഗത്തെത്തി. ഒരേസമയം ഒരുപോലത്തെ ചിത്രങ്ങൾ മാത്രമേ വരയ്‌ക്കാൻ സാധിക്കൂവെന്നും വ്യത്യസ്ത തരത്തിലുള്ള ചിത്രങ്ങൾ സാധ്യമല്ലെന്നുമായിരുന്നു ചിലരുടെ പ്രതികരണം.