ആരോഗ്യമുള്ളതും കരുത്തുള്ളതുമായ മുടിയാണ് എല്ലാവരുടെയും സ്വപ്നം. പണ്ട് കാലത്തെ പോലെ കാച്ചിയ എണ്ണയും താളിയും കറ്റാർവാഴയും തേക്കുന്ന പെൺകുട്ടികളും സത്രീകളുമല്ല ഇപ്പോഴുള്ളത്. സ്ട്രൈറ്റനിംഗ്, കേളിംഗ്, ബ്ലോ ഡ്രൈയിംഗ്, ക്രിമ്പിംഗ് ഉപകരണങ്ങൾ എന്നിവ ഇടയ്ക്കിടെ ഉപയോഗിക്കുന്നവരാണ് ഭൂരിഭാഗം ആളുകളും. കല്യാണത്തിനും മറ്റ് പരിപാടികളിലും ചെത്തിമിനുങ്ങി നിൽക്കുന്നവരാണ് സ്ത്രീകൾ. എന്നാൽ ഇതിന് ശേഷം മുടിയുടെ ആരോഗ്യകാര്യത്തിൽ ശ്രദ്ധ പുലർത്തുന്നവരണോയെന്ന് ചിന്തിക്കേണ്ടിയിരിക്കുന്നു. മുടിയിൽ വിവിധ ന്യൂജെൻ ഉപകരണങ്ങൾ ഉപയോഗിച്ച് മുടി കോലം കെട്ടുവെന്ന് പരാതി പറയാതെ ഈ പൊടിക്കൈകളൊന്ന് പരീക്ഷിച്ച് നോക്കൂ..
ശരീരത്തിലെ പോലെ തന്നെ ഏറെ അഴുക്ക് അടിഞ്ഞ് കൂടുന്നിടമാണ് തലമുടിയും. തലയോട്ടിയി വൃത്തിയായി കഴുകുന്നുണ്ടെന്ന് ഉറപ്പ് വരുത്തണം. അല്ലാത്തപക്ഷം താരൻ വരാൻ സാദ്ധ്യതയേറെയാണ്. മുടി വൃത്തിയാക്കാൻ വീര്യം കുറഞ്ഞ ഷാംപൂ ഉപയോഗിക്കാവുന്നതാണ്. തുടർന്ന് കണ്ടീഷണർ ഉപയോഗിക്കണം. എന്നാൽ മാത്രമേ മുടിയുടം മൃദത്വം കൈവരികയുള്ളൂ.
തലയോട്ടിയെയും മുടിയും മസാജ് ചെയ്യുന്നത് മുടിയുടെ ആരോഗ്യത്തിന് നല്ലതാണ്. മസാജിനായി വെളിച്ചെണ്ണ ഉപയോഗിക്കുന്നതാണ് ഏറ്റവും നല്ലത്. കിടക്കും മുൻപ് മസാജ് ചെയ്യുന്നതാണ് ഉത്തമം. മസാജിന് ശേഷം ചൂടുവെള്ളത്തിൽ മുക്കിയ ടവ്വൽ തലയിൽ പൊതിയുക. 15-20 മിനിറ്റ് വരെ ഇത് തുടരണം. നിങ്ങളുടെ തലയോട്ടിയും മുടിയും എണ്ണ ആഗിരണം ചെയ്ത് മികച്ച ഫലങ്ങൾ നൽകുന്നതിനാണ് ഇങ്ങനെ ചെയ്യുന്നത്. അടുത്ത ദിവസം വീര്യം കുറഞ്ഞ ഷാംപൂ ഉപയോഗിച്ച് കഴുകിക്കളയുക.
എല്ലാ തരം പോഷകങ്ങളും മുടിയ്ക്ക് ലഭ്യമായാൽ മാത്രമാണ് മുടി കൊഴിച്ചിൽ, താരൻ, മുടി പൊട്ടുന്നത് തുടങ്ങി പ്രശ്നങ്ങൾക്ക് ശമനമാകൂ.ഇതിനായി കൊളാജൻ, ആന്റിഓക്സിഡന്റുകൾ എന്നിവയുടെ സപ്ലിമെന്റുകൾ ഉപയോഗിക്കാവുന്നതാണ്. ഈ സപ്ലിമെന്റുകൾ മുടിക്ക് ഉണ്ടാകുന്ന കേടുപാടുകൾ മാറ്റുന്നതിൽ പ്രധാന പങ്ക് വഹിക്കുന്നു. നനഞ്ഞ മുടിയുമായി പുറത്തിറങ്ങുന്നത് വളരെ അപകടകരമാണ്. കാരണം പൊടിയും മറ്റ് അഴക്കുകളും നനഞ്ഞ മുടിയിൽ വേഗം പറ്റി പിടിക്കും. പുറത്തിറങ്ങുന്നതിന് മുൻപായി മുടി ഉണങ്ങിയെന്ന് ഉറപ്പ് വരുത്തണം. തലമുടി മറയ്ക്കുന്നതിനായി തൊപ്പി ഉപയോഗിക്കാവുന്നതാണ്.
മുടി വളർച്ചയിൽ സുപ്രധാന പങ്ക് വഹിക്കുന്ന ഒന്നാണ് വെള്ളം. ദിവസവും അഞ്ച് ലിറ്ററിൽ കുറയാതെ വെള്ളം കുടിക്കണമെന്നാണ് ആരോഗ്യ വിദഗ്ധർ നൽകുന്ന ഉപദേശം. മുടിയിൽ ജലാംശം നിലനിർത്താൻ പഴങ്ങളും പച്ച ഇലക്കറികളും കഴിക്കുക. ഹെയർ സിറം ഉപയോഗിക്കുമ്പോഴും ശ്രദ്ധിക്കണം. അതിലെ ചേരുവകൾ മനസിലാക്കിയ ശേഷം മാത്രമേ സിറം തിരഞ്ഞെടുക്കാൻ പാടുള്ളൂ.
ഹെയർ വാക്സ്, ജെൽ അല്ലെങ്കിൽ ഹെയർ സ്ട്രൈനറുകൾ പോലുള്ള കെമിക്കലുകൾ മുടിക്ക് കേടുവരുത്തുന്നതിനാൽ അവ ഒഴിവാക്കുന്നതാണ് നല്ലത്. ഇത്തരം കെമിക്കലുകൾ മുടിയുടെ സ്വാഭാവിക വളർച്ച തടയുകയും മൃദുത്വം നഷ്ടപ്പെടുത്തുകയും ചെയ്യുന്നു.
