ഇസ്ലാമാബാദ്: ട്വന്റി-20 ലോകകപ്പ് മത്സരത്തിൽ സിംബാബ്വെ ഇന്ത്യയെ പരാജയപ്പെടുത്തിയാൽ ഉറപ്പായും സിംബാബ് വെ പൗരനെ വിവാഹം കഴിക്കുമെന്ന് പാകിസ്താൻ നടി സെഹർ ഷിൻവാരി. കഴിഞ്ഞ ദിവസം നടന്ന മത്സരത്തിൽ ഇന്ത്യ പാക് ടീമിനെ തോൽപ്പിച്ചതോടെയാണ് നടിയുടെ ഈ കടുത്ത പ്രഖ്യാപനം. ഇന്നലെ നടന്ന ഇന്ത്യ- ബംഗ്ലാദേശ് മത്സരത്തിനിടെ ഇന്ത്യ തോൽക്കാനാണ് ആഗ്രഹിക്കുന്നതെന്ന് നടി ട്വീറ്റ് ചെയ്തിരുന്നു.
അവരുടെ ടീം ഇന്ത്യയെ പരാജയപ്പെടുത്തുകയാണെങ്കിൽ തീർച്ചയായും ഒരു സിംബാബ് വെ പൗരനെ തന്നെ വിവാഹം കഴിക്കുമെന്നാണ് നടി ട്വീറ്റ് ചെയ്തത്.നിരവധി പേരാണ് ഈ ട്വീറ്റിനെ പിന്തുണച്ചും ട്രോളിയും രംഗത്തെത്തിയിരിക്കുന്നത്. അങ്ങനെയെങ്കിൽ ജീവിതകാലം മുഴുവൻ താങ്കൾ അവിവാഹിതയായി തുടരേണ്ടി വരുമെന്ന് ഒരാൾ പരിഹസിച്ചിട്ടുണ്ട്.അടുത്ത ഞായറാഴ്ചയാണ് ഇന്ത്യയും സിംബാബ് വെയും തമ്മിലുള്ള മത്സരം.
അതേസമയം പോയിന്റ് നിലയിൽ അഞ്ചാം സ്ഥാനത്താണ് പാകിസ്താനുള്ളത്. മൂന്ന് മത്സരങ്ങളിൽ നിന്ന് ഒരു ജയം മാത്രമാണ് പാകിസ്താൻ നേടിയത്. ഇന്ത്യയോട് തോറ്റതിന് പിന്നാലെ പാകിസ്താൻ ഒരു റൺസിന് സിംബാബ്വെയോടും തോറ്റിരുന്നു. ഇന്ന് ദക്ഷിണാഫ്രിക്കയ്ക്കെതിരെ നടക്കുന്ന മത്സരത്തിലും പാകിസ്താൻ തോറ്റാൽ സെമി കാണാതെ പുറത്താവും.
Comments