ചെന്നൈ: ‘നില്ല് നില്ല് നീല കുയിലേ’ എന്ന് തുടങ്ങുന്ന ഗാനം തരംഗമാകുകയും വാഹനങ്ങൾ തടഞ്ഞ് ഈ ഗാനത്തിനനുസരിച്ച് യുവാക്കൾ ആടുകയും ചെയ്യുന്ന സംഭവം വൻ വിവാദമായിരുന്നു. ടിക്ക്ടോക്കിൽ പ്രചരിപ്പിക്കുന്നതിനായിട്ടായിരുന്നു ഗതാഗത സംവിധാനത്തെ പോലും തകിടം മറിച്ച് യുവാക്കൾ വീഡിയോ ഷൂട്ട് ചെയ്തിരുന്നത്. കർശന നടപടിയുമായി പോലീസ് എത്തിയതോടെ യുവാക്കളുടെ നില്ല് നില്ല് ട്രെൻഡിന് വിരാമമായി. ഇപ്പോഴിതാ ജനങ്ങളെ ഒരുകാലത്ത് ബുദ്ധിമുട്ടിച്ച പഴയ ട്രെൻഡിനെ ഓർമ്മപ്പെടുത്തി അടുത്ത പാട്ടുമായി എത്തിയ വിദ്യാർത്ഥികളെ പിടികൂടിയിരിക്കുകയാണ് പോലീസ്.
ഇൻസ്റ്റഗ്രാമിൽ ഏറെ ട്രെൻഡിംഗായി നിൽക്കുന്ന ‘മെയ്ക്ക് എ സീനാണ്’ വിദ്യാർത്ഥികൾ ഇത്തവണ പരീക്ഷിച്ചത്. ഹൈവേയിൽ ഓടുന്ന ബസിനെ തടഞ്ഞുനിർത്തിയ വിദ്യാർത്ഥികൾ ട്രെൻഡിന്റെ ഭാഗമായി പാട്ടുവെച്ച് മുഖം പൊത്തി ആടുകയായിരുന്നു. ഏതാനും മിനിറ്റുകൾ നീണ്ടു നിന്ന സംഭവത്തിന്റെ ദൃശ്യങ്ങൾ വൈറലായതോടെയാണ് വിദ്യാർത്ഥികൾക്ക് പണി കിട്ടിയത്.
ചെന്നൈയിലെ കോയമ്പേട് നിന്ന് പൂനമല്ലിയിലേക്ക് പോയ ബസായിരുന്നു വിദ്യാർത്ഥികൾ തടഞ്ഞ് ഡാൻസ് കളിച്ചത്. തുടർന്ന് റീലായി ചിത്രീകരിച്ച വീഡിയോ വിദ്യാർത്ഥികൾ ഇൻസ്റ്റഗ്രാമിൽ പോസ്റ്റ് ചെയ്തു. വീഡിയോ വൈറലായതോടെ ദൃശ്യങ്ങൾ ഗ്രേറ്റർ ചെന്നൈ പോലീസിന്റെ ശ്രദ്ധയിൽപ്പെടുകയായിരുന്നു. തുടർന്ന് വിദ്യാർത്ഥികളെ പോലീസ് പിടികൂടി. ശേഷം വിദ്യാർത്ഥികൾ തടഞ്ഞ അതേ ബസിന്റെ മുന്നിലെത്തിക്കുകയും മേലാൽ ആവർത്തിക്കില്ലെന്ന് പ്രതിജ്ഞയെടുപ്പിക്കുകയുമായിരുന്നു.
