അഗർത്തല: ഉറങ്ങി കിടന്ന കുടുംബാംഗങ്ങളെ കോടാലിയ്ക്ക് വെട്ടി കൊലപ്പെടുത്തി കിണറ്റിൽ താഴ്ത്തി 17-കാരൻ. ത്രിപുരയിലെ ധലായ് ജില്ലയിലാണ് നാടിനെ നടുക്കിയ സംഭവമുണ്ടായത്. സംഭവത്തിൽ 17-കാരനെ അറസ്റ്റ് ചെയ്തിട്ടുണ്ട്.
കഴിഞ്ഞ ദിവസമാണ് കേസിനാസ്പദമായ സംഭവം.രാത്രി ഉറങ്ങുകയായിരുന്ന മുത്തച്ഛനെയും അമ്മയെയും പ്രായപൂർത്തിയാകാത്ത സഹോദരിയെയും അമ്മായിയെയും പ്രതി കോടാലി ഉപയോഗിച്ച് കൊലപ്പെടുത്തുകയായിരുന്നുവെന്ന് പോലീസ് വ്യക്തമാക്കി. കുട്ടിയുടെ പിതാവ് വീട്ടിലെത്തുമ്പോഴാണ് സംഭവം പുറം ലോകമറിയുന്നത്. കൊലപാതകത്തിന് പിന്നിലെ കാരണം വ്യക്തമല്ലെന്ന് പോലീസ് പറഞ്ഞു. സംഭവത്തിൽ അന്വേഷണങ്ങൾ പുരോഗമിക്കുന്നതായി പോലീസ് അറിയിച്ചു.
കുട്ടി ടെലിവിഷന് അടിമയാണെന്നും കുറ്റാന്വേഷണ പരിപാടികൾ സ്ഥിരമായി കണ്ടിരുന്നതായും പ്രദേശത്തുള്ളവർ പറഞ്ഞു. ഇതാണോ കൊലയ്ക്ക് പിന്നിലെന്നാണ് പോലീസിന്റെ സംശയം. കൊല നടന്ന ദിവസം രാത്രി വളരെ വൈകിയും വീട്ടിൽ നിന്ന് പാട്ട് കേട്ടിരുന്നതായി അയൽവാസികൾ പറഞ്ഞു. കുട്ടി നേരത്തെ മോഷണം നടത്തിയിരുന്നതായും പ്രദേശവാസികൾ വ്യക്തമാക്കി.
Comments