ന്യൂഡൽഹി: ട്വിറ്ററിന്റെ പുതിയ മാറ്റങ്ങളെ പരിഹസിച്ച് ഫുഡ് ഡെലിവറി ആപ്പായ സൊമാറ്റോ. ഇലോൺ മസ്ക് ട്വിറ്റർ ഏറ്റെടുത്തതിന് പിന്നാലെ നിരവധി മാറ്റങ്ങളാണ് വന്നുകൊണ്ടിരിക്കുന്നത്. വെരിഫൈഡ് അക്കൗണ്ടുകൾക്ക് നൽകുന്ന ബ്ലൂ ടിക്ക് ബാഡ്ജുകൾക്ക് ഇനി മുതൽ പ്രതിമാസം പണം നൽകണമെന്നാണ് മസ്കിന്റെ പുതിയ തീരുമാനം. ഇതിനെയാണ് സൊമാറ്റോ ട്വിറ്റർ വഴി പരിഹസിച്ചത്. എന്നാൽ ഏറ്റവും കൂടുതൽ കിഴിവ് നൽകുന്ന ഫുഡ് ഡെലിവറി കമ്പനിയ്ക്ക് വൻ ട്രോളാണ് ഉപയോക്താക്കളിൽ നി്ന്ന് ലഭിച്ചത്.
ok elon, how about $8 with 60% off up to $5?
— zomato (@zomato) November 3, 2022
അക്കൗണ്ടുകളിൽ ബ്ലൂ ടിക്ക് ബാഡ്ജുകൾ ആവശ്യമുള്ളവർ പ്രതിമാസം 8 ഡോളർ നൽകണമെന്നാണ് മസ്ക് ആവശ്യപ്പെട്ടത്. എന്നാൽ 60 ശതമാനം കിഴിവ് നൽകി ചാർജ് 5 ഡോളറാക്കി കൂടെയെന്നാണ് സൊമാറ്റോ ചോദിച്ചത്. സബ്സ്ക്രിപ്ഷൻ ചാർജിലൂടെ വൻ വരുമാനം നേടാൻ ലക്ഷ്യമിടുന്ന മസ്കിനെ വിമർശിക്കുന്ന തരത്തിലാണ് സൊമാറ്റോയുടെ ട്വീറ്റ്.
ട്വീറ്റിന് നിരവധി പേരാണ് കമന്റുമായെത്തിയത്. 60% കിഴിവ് നൽകിയാൽ നിരക്കുകൾ 3.2 ഡോളറാകും പാക്കേജിംഗിനും ഹാൻഡ്ലിംഗിനുമായി 2.4 ഡോളർ, ഡെലിവറി ചാർജുകളായി 2.4 ഡോളർ. അങ്ങനെയാകെ 8 ഡോളർ മുടക്കേണ്ടതായി വരുമെന്ന് ഒരാൾ കമന്റ് ചെയ്തു. നിങ്ങളെ പോലെ ആകർഷകമായ തുക വിലയായി നിശ്ചയിച്ച് അതിന് കിഴിവ് നൽകുന്ന ആൾ അല്ലാ മസ്ക് എന്ന് ഒരു ഉപയോക്താവ് പറഞ്ഞു. ആപ്പിലെ അധിക ചെലവിനെ വിമർശിച്ചും കമന്റെത്തി.
44 ബില്യൺ ഡോളർ മുതൽ മുടക്കി ട്വിറ്റർ വാങ്ങിയതോടെ ഈ പണം ട്വിറ്ററിലൂടെ തന്നെ തിരിച്ചു പിടിക്കാനാണ് മസ്കിന്റെ ഉദ്ദേശ്യം. ട്വിറ്ററിന്റെ വെരിഫൈഡ് അക്കൗണ്ടുകൾക്ക് അടുത്ത ആഴ്ച മുതൽ പണം ഈടാക്കിയേക്കും. വെരിഫൈഡ് അക്കൗണ്ടിന്റെ ബ്ലൂ ടിക്ക് ബാഡ്ജിനാണ് ട്വിറ്റർ പണം ഈടാക്കുക. പ്രതിമാസം 8 ഡോളറാണ് നിരക്ക്.
Comments