ഇസ്ലാമാബാദ്: അഫ്ഗാൻ അതിർത്തിയോട് ചേർന്ന പാക് പോലീസ് സ്റ്റേഷന് നേർക്ക് ആയുധധാരികളുടെ വെടിവെയ്പ്. ബുധനാഴ്ച രാവിലെയാണ് ആക്രമണം ഉണ്ടായത്. സംഭവത്തിൽ രണ്ട് പോലീസുകാർ കൊല്ലപ്പെട്ടു. രണ്ട് പേർക്ക് പരിക്കേൽക്കുകയും ചെയ്തു.
സ്റ്റേഷനിൽ ഉണ്ടായിരുന്ന പോലീസുകാരുടെ ആയുധങ്ങളും കൊളളയടിച്ച ശേഷമാണ് അക്രമികൾ മടങ്ങിയത്. സ്റ്റേഷനിലെ വാഹനങ്ങളും ഇവർ നശിപ്പിച്ചു. അഫ്ഗാൻ അതിർത്തിയോട് ചേർന്ന സൗത്ത് വസീറിസ്ഥാനിലെ റാഗ്സായ് പോലീസ് സ്റ്റേഷനിലായിരുന്നു ആക്രമണം.
ഹമീദ് ഉളള, ഫർമാൻ ഉളള എന്നീ രണ്ട് സബ് ഇൻസ്പെക്ടർമാരാണ് കൊല്ലപ്പെട്ടത്. ആക്രമണത്തിന് പിന്നാലെ തന്നെ കൂടുതൽ പോലീസെത്തി പ്രദേശം വളഞ്ഞ് തിരച്ചിൽ നടത്തിയെങ്കിലും അക്രമികളെ കണ്ടെത്താൻ കഴിഞ്ഞിട്ടില്ല. പ്രവിശ്യാ മുഖ്യമന്ത്രി മെഹ്മൂദ് ഖാൻ ആക്രമണത്തെ അപലപിച്ചു. അക്രമികളെ എത്രയും വേഗം പിടികൂടുമെന്നും അദ്ദേഹം പറഞ്ഞു.
ഞായറാഴ്ച സിന്ധ് പ്രവിശ്യയിൽ ഒരു പോലീസ് ക്യാമ്പിന് നേർക്ക് തീവെട്ടിക്കൊളളക്കാർ നടത്തിയ ആക്രമണത്തിൽ അഞ്ച് പോലീസുകാർ കൊല്ലപ്പെട്ടതായി വാർത്തകൾ പുറത്തുവന്നിരുന്നു. നൂറ്റിയൻപതോളം വരുന്ന സംഘമാണ് അന്ന് ആക്രമണം നടത്തിയതെന്നായിരുന്നു വാർത്തകൾ.
