കൊല്ലം: കൊട്ടാരക്കര ഏഴുകോണിൽ ഗാന്ധി പ്രതിമയുടെ തല തകർത്തു. ഇന്നലെ രാത്രിയോടെയായിരുന്നു സംഭവം. ഏഴുകോൺ കോൺഗ്രസ് കമ്മിറ്റി സ്ഥാപിച്ച ഗാന്ധി പ്രതിമയ്ക്ക് നേരെയാണ് ആക്രമണം ഉണ്ടായത്. സംഭവത്തിന് പിന്നിൽ സിപിഎം ആണെന്നാണ് സൂചന.
തിങ്കളാഴ്ച കൊടിക്കുന്നിൽ സുരേഷ് എംപി ഉദ്ഘാടനം ചെയ്യാനിരിക്കെയാണ് പ്രതിമ നശിപ്പിച്ചത്. പ്രതിമയുടെ തല അറുത്തുമാറ്റിയ നിലയിലായിരുന്നു. രണ്ട് ദിവസം മുൻപ് പ്രതിമയുടെ കണ്ണട മോഷണം പോയിരുന്നു. ഇതിന് പിന്നാലെയാണ് ഗാന്ധി പ്രതിമയുടെ തല തകർത്തിരിക്കുന്നത്. സംഭവത്തിൽ കോൺഗ്രസ് നേതാക്കളുടെ പരാതിയിൽ പോലീസ് കേസ് എടുത്ത് അന്വേഷണം ആരംഭിച്ചു.
നേരത്തെ ഇവിടെയുണ്ടായിരുന്ന ഗാന്ധി സ്മൃതി മണ്ഡപം തകർത്തിരുന്നു. ഇതേ തുടർന്നാണ് അതേ സ്ഥലത്ത് വീണ്ടും കോൺഗ്രസ് ഗാന്ധിജിയുടെ പ്രതിമ സ്ഥാപിച്ചത്. സിപിഎം പ്രവർത്തകർ നേരത്തെയും പ്രതിമയ്ക്ക് നേരെ ആക്രമണം നടത്തിയിട്ടുണ്ടെന്നാണ് കോൺഗ്രസ് പറയുന്നത്.
Comments