ന്യൂഡൽഹി: സീതാറാം യെച്ചൂരി ‘ടു ഇൻ വൺ‘ ജനറൽ സെക്രട്ടറി ആണെന്ന് കോൺഗ്രസ് മാദ്ധ്യമ വിഭാഗം തലവൻ ജയറാം രമേശ്. ഒരേ സമയം കോൺഗ്രസിന്റെയും സിപിഎമ്മിന്റെയും ജനറൽ സെക്രട്ടറിയുടെ പണിയാണ് യെച്ചൂരി എടുക്കുന്നത്. മോദിക്കെതിരായ പോരാട്ടത്തിൽ ഇടത് പാർട്ടികൾക്കൊപ്പമാണ് കോൺഗ്രസ് എന്നും ജയറാം രമേശ് പറഞ്ഞു. ആർ എസ് പി ദേശീയ സമ്മേളന വേദിയിൽ സംസാരിക്കുകയായിരുന്നു ജയറാം രമേശ്.
കോൺഗ്രസ് നേതാവ് രാഹുൽ ഗാന്ധി നയിക്കുന്ന ‘ഭാരത് ജോഡോ യാത്ര‘ പ്രതിപക്ഷത്തെ ചേർത്ത് നിർത്തുന്ന ഫെവിക്കോൾ ആണെന്നും ജയറാം രമേശ് അഭിപ്രായപ്പെട്ടു. ആർ എസ് പി നേതാവ് എൻ കെ പ്രേമചന്ദ്രൻ മികച്ച പാർലമെന്റേറിയനാണ്. പി രാജീവും പ്രേമചന്ദ്രനും തനിക്ക് ഏറെ പ്രിയപ്പെട്ട പാർലമെന്റേറിയന്മാരാണെന്നും ജയറാം രമേശ് പറഞ്ഞു.
ആർ എസ് പി ദേശീയ സമ്മേളനത്തിന്റെ ഭാഗമായുള്ള ഓപ്പൺ സെമിനാറിൽ സംസാരിക്കവെയായിരുന്നു എ ഐ സി സി ജനറൽ സെക്രട്ടറിയും മുതിർന്ന കോൺഗ്രസ് നേതാവുമായ ജയറാം രമേശിന്റെ പ്രതികരണം. സീതാറാം യെച്ചൂരി, ഫോർവേഡ് ബ്ലോക്ക് നേതാവ് ജി ദേവരാജൻ എന്നിവരും പരിപാടിയിൽ സംസാരിച്ചു.
Comments