മുസാഫർപുർ: ബിഹാറിൽ മോഷ്ടാക്കളെ താലിബാൻ മാതൃകയിൽ പ്രാകൃതമായി കൈകാര്യം ചെയ്ത് നാട്ടുകാർ. മോഷണക്കുറ്റത്തിന് നാട്ടുകാർ പിടികൂടിയ യുവാക്കളെ തൂണിൽ കെട്ടിയിട്ട് മൃഗീയമായി മർദ്ദിക്കുകയായിരുന്നു. സംഭവത്തിന്റെ വീഡിയോ സാമൂഹിക മാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
അഹിയാപൂർ പോലീസ് സ്റ്റേഷൻ പരിധിയിലെ ദാദറിൽ മാർബിൾ കടയിൽ നിന്നും സാധനങ്ങൾ മോഷ്ടിച്ചതിനാണ് രണ്ട് യുവാക്കളെ നാട്ടുകാർ പിടികൂടിയത്. തല്ലുകൊണ്ട് നിലവിളിക്കുന്ന യുവാക്കളെ നാട്ടുകാർ നിഷ്കരുണം മർദ്ദിക്കുകയായിരുന്നു. ആദ്യം വടികൊണ്ടും പിന്നീട് പാറക്കല്ല് കൊണ്ടും യുവാക്കളുടെ കൈകാലുകളിലും തലയിലുമാണ് മർദ്ദിച്ചത്.
മർദ്ദനം തുടരുന്നതിനിടെ ആരോ സംഭവം പോലീസിനെ അറിയിക്കുകയായിരുന്നു. തുടർന്ന് പോലീസെത്തി ആൾക്കൂട്ടത്തെ പിരിച്ചു വിട്ട ശേഷം യുവാക്കളെ കസ്റ്റഡിയിൽ എടുക്കുകയായിരുന്നു. പിന്നീട് ഇവരെ ആശുപത്രിയിൽ പ്രവേശിപ്പിച്ചതായാണ് വിവരം.
