മുംബൈ: റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി ഇംഗ്ലീഷ് പ്രീമിയർ ലീഗ് ക്ലബ് ലിവർപൂൾ എഫ് സിയെ സ്വന്തമാക്കാൻ ഒരുങ്ങുന്നതായി റിപ്പോർട്ട്. നിലവിൽ ഫെന്വേ സ്പോർട്സ് ഗ്രൂപ്പിന്റെ ഉടമസ്ഥതയിലുള്ള ലിവർപൂളിന്റെ ഉടമസ്ഥവകാശം സ്വന്തമാക്കുന്നതുമായി ബന്ധപ്പെട്ട് അംബാനി ചർച്ചകൾ നടത്തി എന്നാണ് സൂചന.
ലോകത്തിലെ എട്ടാമത്തെ വലിയ സമ്പന്നൻ എന്ന് ഫോർബ്സ് മാസിക വിശേഷിപ്പിച്ച അംബാനിയുടെ ആകെ ആസ്തി 90 ബില്ല്യൺ ഡോളറാണ്. 2010ൽ എഫ് എസ് ജി ഏറ്റെടുത്ത ലിവർപൂളിന് പുതിയ ഉടമകളെ തേടുന്നു എന്ന വാർത്ത അടുത്തയിടെയാണ് പുറത്തു വന്നത്.
2010ലും ലിവർപൂൾ സ്വന്തമാക്കാൻ മുകേഷ് അംബാനി ശ്രമങ്ങൾ നടത്തിയിരുന്നു. സഹാറാ ഗ്രൂപ്പുമായി ചേർന്ന്, ക്ലബ്ബിന്റെ 51 ശതമാനം ഓഹരികൾ വാങ്ങാനായിരുന്നു അംബാനി അന്ന് ശ്രമം നടത്തിയത്. എന്നാൽ ഇത്തരത്തിൽ വന്ന വാർത്തകൾ ലിവർപൂൾ എഫ് സി നിഷേധിക്കുകയും ക്ലബ്ബ് എഫ് എസ് ജി സ്വന്തമാക്കുകയുമായിരുന്നു.
