മെൽബൺ: ട്വന്റി 20 ലോകകപ്പ് ഫൈനലിൽ ഇംഗ്ലണ്ടിനോട് തോറ്റതിന്റെ വിഷമത്തിൽ മൈതാനത്ത് കണ്ണീർ പൊഴിച്ച് പാകിസ്താൻ ക്യാപ്ടൻ ബാബർ അസം. തോൽവിയുടെ നിരാശയിൽ കരയുന്ന ബാബർ അസമിനെ ആശ്വസിപ്പിക്കുന്ന സഹതാരം ഷദബ് ഖാന്റെ ചിത്രം സാമൂഹിക മാദ്ധ്യമങ്ങളിൽ വൈറലാകുന്നു.
പാകിസ്താനെ 5 വിക്കറ്റിന് തകർത്താണ് ഇംഗ്ലണ്ട് രണ്ടാം ട്വന്റി 20 ലോകകിരീടം സ്വന്തമാക്കിയത്. ബൗളിംഗിലും ഫീൽഡിംഗിലും ബാറ്റിംഗിലും വ്യക്തമായ ആധിപത്യം പുലർത്തിയായിരുന്നു പാകിസ്താനെതിരെ ഇംഗ്ലണ്ട് വിജയിച്ചത്. 4 ഓവറിൽ 12 റൺസ് മാത്രം വഴങ്ങി 3 വിക്കറ്റ് വീഴ്ത്തിയ സാം കറനും 2 വിക്കറ്റ് വീഴ്ത്തിയ ആദിൽ റഷീദും അർദ്ധസെഞ്ച്വറിയുമായി പുറത്താകാതെ നിന്ന ബെൻ സ്റ്റോക്സും ചേർന്നാണ് ഇംഗ്ലണ്ടിന് തകർപ്പൻ ജയമൊരുക്കിയത്.
പാക് ബൗളിംഗ് നിരയെ ആക്രമണത്തിലൂടെ പ്രതിരോധിക്കുക എന്ന തന്ത്രമാണ് ഇംഗ്ലണ്ട് മൈതാനത്ത് ഫലപ്രദമായി നടപ്പിലാക്കിയത്. ക്രിക്കറ്റിന്റെ ചരിത്രമുറങ്ങുന്ന മെൽബണിൽ 80,462 കാണികളെ സാക്ഷി നിർത്തിയായിരുന്നു ഇംഗ്ലണ്ട് പാകിസ്താന് മേൽ ജയം കുറിച്ചത്.
