ഉണ്ണി മുകുന്ദൻ നായകനാകുന്ന ‘ഷെഫീക്കിന്റെ സന്തോഷം’ എന്ന ചിത്രത്തിന്റെ ടീസർ പുറത്തുവിട്ടു. നവാഗതനായ അനൂപ് പന്തളമാണ് ചിത്രം സംവിധാനം ചെയ്യുന്നത്. ഒരു ഫീൽഗുഡ് മൂവി ആണെന്ന് ഉറപ്പ് നൽകുന്ന രസകരമായ ടീസറാണ് അണിയറപ്രവർത്തകർ പുറത്തു വിട്ടിരിക്കുന്നത്. അനൂപ് പന്തളം തന്നെയാണ് ചിത്രത്തിന്റെ തിരക്കഥ രചിച്ചിരിക്കുന്നതും. നവംബർ 25 ന് സിനിമ തിയറ്ററുകളിൽ റിലീസ് ചെയ്യും. ചിത്രം തിയറ്ററിൽ പോയി എല്ലാവരും കാണണമെന്ന് ഉണ്ണി മുകുന്ദൻ ഫെയ്സ്ബുക്ക് ലൈവിലൂടെ അഭ്യർത്ഥിച്ചു.
‘നല്ല ഒരു കൊച്ചു സിനിമയായിരിക്കും ഷഫീക്കിന്റെ സന്തോഷം. രസകരമായ കുടുംബ ചിത്രമാണ് ഇത്. ഹാസ്യവും പ്രണയവും വൈകാരികതയും എല്ലാം നിറഞ്ഞ ഒരു കൊച്ചു ചിത്രം. ഷഫീക്ക് എന്ന് വ്യക്തിയുടെ ജീവിതത്തിലുണ്ടാകുന്ന രസകരമായ സംഭവ വികാസങ്ങളിലൂടെയാണ് ചിത്രം മുന്നോട്ട് പോകുന്നത്. താൻ ചെയ്തിൽ വച്ച് വ്യത്യസ്തമായ കഥാപാത്രങ്ങളിൽ ഒന്നാണ് ഷഫീക്ക്’ എന്നും ചിത്രത്തിൽ നടൻ ബാലയുടെ ഗംഭീര പ്രകടനം കാണാൻ സാധിക്കുമെന്നും ഉണ്ണിമുകുന്ദൻ പറഞ്ഞു. മേപ്പടിയാന് ശേഷം ഉണ്ണി മുകുന്ദൻ നിർമ്മിക്കുന്ന ചിത്രം കൂടിയാണ് ഷെഫീഖിന്റെ സന്തോഷം.
മനോജ് കെ ജയൻ, ദിവ്യാ പിള്ള, ആത്മീയ രാജൻ, ഷഹീൻ സിദ്ദിഖ്, മിഥുൻ രമേശ്, സ്മിനു സിജോ എന്നിവരും മറ്റ് മുഖ്യവേഷങ്ങളിലുണ്ട്. ഷാൻ റഹ്മാനാണ് സംഗീത സംവിധാനം. എൽദോ ഐസക് ഛായാഗ്രഹണവും നൗഫൽ അബ്ദുള്ള എഡിറ്റിംഗും നിർവ്വഹിക്കുന്നു. പ്രൊഡക്ഷൻ കണ്ട്രോളര്-വിനോദ് മംഗലത്ത്, മേക്കപ്പ്- അരുണ് ആയൂര്, വസ്ത്രാലങ്കാരം- അരുണ് മനോഹര്, സ്റ്റില്സ്- അജി മസ്ക്കറ്റ്, അസോസിയേറ്റ് ഡയറക്ടര്- രാജേഷ് കെ രാജൻ എന്നിവരാണ് മറ്റ് അണിയറ പ്രവർത്തകർ.
Comments