കൊച്ചി : ആഗോള സംരംഭക മത്സരത്തിൽ ഒന്നാം സ്ഥാനം നേടിക്കൊണ്ട് രാജ്യത്തിന് അഭിമാനമായി മാറിയിരിക്കുകയാണ് കാക്കനാട് ഭവൻസ് ആദർശ വിദ്യാലയത്തിലെ വിദ്യാർത്ഥികൾ. അനശ്വര രമേഷ്, ദക്ഷിണ ചാരു ചിത്ര, ആദിത്യ ദിനേശ്, കെ. മനോജ് കൃഷ്ണ എന്നീ വിദ്യാർത്ഥികളാണ് ടൈ യങ് എന്റർപ്രണേഴ്സ് ഗ്ലോബൽ പിച്ച് മത്സരത്തിൽ അതുല്യ നേട്ടം കൈവരിച്ചത്. സിറ്റ്‌ലൈൻ എന്ന ഇവരുടെ ആശയമാണ് അന്താരാഷ്‌ട്ര തലത്തിൽ ശ്രദ്ധയാകർഷിച്ചത്.
ഓരോരുത്തരുടെയും ഇരിപ്പിന്റെ ഘടന ആരോഗ്യപ്രദമാക്കാൻ സഹായിക്കുന്ന സാങ്കേതിക വിദ്യയാണിത്. ഐടി മേഖലയിലും മറ്റും ജോലി ചെയ്യുന്നവർ നേരിടുന്ന പുറം വേദനയ്‌ക്ക് നടുവേദനയ്‌ക്കും ഒരു ശാശ്വത പരിഹാരം. ഇതിന്റെ ഭാഗമായി ഈ ആശയത്തിന്റെ മോഡലും കുട്ടികൾ നിർമ്മിച്ചുകഴിഞ്ഞു.
4,500 ഡോളർ (ഏതാണ്ട് മൂന്നര ലക്ഷം രൂപ) ക്യാഷ് അവാർഡും സർട്ടിഫിക്കറ്റുകളും ഭാവിയിലേക്ക് സംരംഭ നിക്ഷേപ സാധ്യതകളും ടീം കരസ്ഥമാക്കിയിട്ടുണ്ട്. മനസിൽ ഉദിച്ച ഒരു ആശയം വളർത്തിയെടുക്കുകയും അത് സമൂഹത്തിന് വേണ്ടി മികച്ച രീതിയിൽ വികസിപ്പിക്കുകയും ചെയ്ത ഹൈസ്‌കൂൾ വിദ്യാർത്ഥികൾ ഇന്ന് മറ്റുള്ളവർക്ക് ഒരു റോൾ മോഡലായിരിക്കുകയാണ്.
Comments