അഹമ്മദാബാദ്: ലയണൽ മെസിയുടെ അർജന്റീനക്ക് പുറമെ ക്രിസ്റ്റ്യാനോ റൊണാൾഡോയുടെ പോർച്ചുഗീസ് ഫുട്ബോൾ ടീമിന്റെയും ഔദ്യോഗിക പ്രാദേശിക സ്പോൺസർഷിപ്പ് ഏറ്റെടുത്ത് ഇന്ത്യൻ ഡെയറി ഭീമൻ അമുൽ. 2022 ഫിഫ ലോകകപ്പിന് മുന്നോടിയായാണ് അർജന്റീനയുടേയും പോർച്ചുഗലിന്റേയും സ്പോൺസർഷിപ്പ് അമുൽ ഏറ്റെടുത്തിരിക്കുന്നത്. ഒരു മാസം മുൻപാണ് അമുൽ അർജന്റീനയുടെ പ്രാദേശിക സ്പോൺസർഷിപ്പ് ഏറ്റെടുത്തത്.
2023 ഡിസംബർ വരെയാണ് പോർച്ചുഗലുമായി അമുലിന്റെ കരാർ. പോർച്ചുഗലുമായി കരാർ ഒപ്പിട്ടതോടെ, ഒരു യൂറോപ്യൻ ഫുട്ബോൾ ടീമിന്റെ ഔദ്യോഗിക സ്പോൺസറാകുന്ന ആദ്യ ഇന്ത്യൻ കമ്പനിയായി ഗുജറാത്തിന്റെ സ്വന്തം അമുൽ മാറി.
പോർച്ചുഗൽ ഫുട്ബോൾ ഫെഡറേഷനുമായി സഹകരിക്കാൻ സാധിക്കുന്നത് അഭിമാനകരമാണെന്ന് അമുൽ ചീഫ് ഓപ്പറേറ്റിംഗ് ഓഫീസർ ജയൻ മേത്ത പറഞ്ഞു. ഇന്ത്യയിൽ വലിയ ആരാധക പിന്തുണയുള്ള ആഗോള കായിക വിനോദമാണ് ഫുട്ബോൾ. പോഷണവും കായിക രംഗവും പരസ്പരം കൈകോർക്കുകയാണ് ഈ കരാറിലൂടെയെന്നും അദ്ദേഹം പറഞ്ഞു. ആരോഗ്യകരമായ ജീവിതരീതി പിന്തുടർന്ന്, മനസ്സും ശരീരവും ഊർജ്ജസ്വലതയോടെ കാത്ത് സൂക്ഷിക്കാൻ ഇന്ത്യയിലെ ഫുട്ബോൾ ആരാധകരോട് അഭ്യർത്ഥിക്കുകയാണെന്നും ജയൻ മേത്ത ട്വീറ്റ് ചെയ്തു.
#AMUL, the leading dairy company in India, is now the new Regional Sponsor of the Portugal National Football team
The Portuguese Football Federation and AMUL, have signed a Regional Sponsorship Agreement until the end of 2023. @selecaoportugal pic.twitter.com/HDFfV2JI3Z
— Amul.coop (@Amul_Coop) November 12, 2022
