അല്ലു അർജ്ജുന്റെ ഏറ്റവും വലിയ വിജയമായിരുന്നു 2021-ൽ പുറത്തിറങ്ങിയ പുഷ്പ. സുകുമാര്‍ സംവിധാനം ചെയ്ത ചിത്രം പല കളക്ഷന്‍ റെക്കോര്‍ഡുകളും തകര്‍ത്തിരുന്നു. ഭാഷയുടെയും രാജ്യത്തിന്റെയും അതിർ വരമ്പുകൾ ഭേദിച്ച് ലോകത്തിന്റെ വിവിധ ഇടങ്ങളിൽ നിന്നും ചിത്രത്തിന് ഗംഭീര അഭിപ്രായങ്ങളാണ് ലഭിച്ചത്. കഴിഞ്ഞ വര്‍ഷത്തെ ഏറ്റവും വലിയ പണംവാരി ചിത്രങ്ങളില്‍ ഒന്നായിരുന്ന പുഷ്പ. ചിത്രത്തിന്റെ വിജയത്തിന് പിന്നാലെ രണ്ടാം ഭാഗത്തിനായുള്ള കാത്തിരിപ്പിലാണ് അല്ലു അർജുൻ ആരാധകരും സിനിമാ പ്രേമികളും.
പുഷ്പ: ദി റൂളിന്റെ ഷൂട്ടിംഗ് ആരംഭിച്ചു എന്ന് വാർത്തകൾ വന്നിരുന്നുവെങ്കിലും അപ്‌ഡേറ്റുകളൊന്നും അണിയറ പ്രവർത്തകർ പുറത്തുവിട്ടിട്ടില്ല. ഇത് ആരാധകർക്കിടയിൽ വലിയ നിരാശയാണ് സമ്മാനിച്ചത്. ഇപ്പോൾ, പുഷ്പ 2-ന്റെ നിർമ്മാണ കമ്പനിയോടും അണിയറ പ്രവർത്തകരോടും പ്രതിഷേധം അറിയിച്ച് രംഗത്തു വന്നിരിക്കുകയാണ് വിവിധ ഇടങ്ങളിൽ നിന്നുള്ള അല്ലു അർജുൻ ആരാധകർ. ചിത്രത്തെപ്പറ്റിയുള്ള അപ്ഡേറ്റ് ആവശ്യപ്പെട്ടു കൊണ്ടാണ് കേരളത്തിൽ നിന്നടക്കമുള്ള ആരാധകർ ബാനറുകളുമായി തെരുവിലിറങ്ങിയത്.
After the success of #PushpaTheRise , the cult of restless #AlluArjun fans have taken to the streets asking for an update on the sequel! This rage amongst fans is absolutely fantastic, a phenomena never witnessed before! The fervour and the excitement in their voices was loud.. pic.twitter.com/Ayu1F4piBj
— Ramesh Bala (@rameshlaus) November 15, 2022
കേരളം, കർണാടക, മഹാരാഷ്‌ട്ര, യുഎഇ തുടങ്ങിയ സ്ഥലങ്ങളിൽ നിന്നുള്ള ആരാധകരാണ് തെരുവിലിറങ്ങി പ്രതിഷേധം അറിയിച്ചത്. നിര്‍മാതാക്കളില്‍ ഒരാളായ ഗീതാ ആര്‍ട്‌സിന്റെ ഓഫീസിന്റെ മുന്നിലും ആരാധകർ ധർണ നടത്തി. ഇനിയും ചിത്രത്തിന്റെ അപ്ഡേറ്റ് നല്‍കിയില്ല എങ്കിൽ മൈത്രി സിനിമയുടെ ഓഫീസിന് മുന്നിലും ധര്‍ണ നടത്തുമെന്ന് അല്ലു അർജുൻ ആരാധകർ പറഞ്ഞു.
