ഇന്ത്യയിലെ ഏറ്റവും വലിയ വാണിജ്യ വാഹന നിർമ്മാതാക്കളായ ടാറ്റ മോട്ടോഴ്‌സ് ഹരിയാന സർക്കാരിനായി ബസുകൾ നിർമ്മിക്കുന്നു. ഹരിയാന റോഡ്‌വേസിൽ നിന്നും 1,000 ബസുകൾക്ക് ഓർഡർ ലഭിച്ചതായി കമ്പനി അറിയിച്ചു. കരാർ പ്രകാരം, 52 സീറ്റുകളുള്ള ബിഎസ് 6-കംപ്ലയിന്റ് ഡീസൽ ബസുകൾ ഘട്ടം ഘട്ടമായി സംസ്ഥാന ഗതാഗത വകുപ്പിന് വിതരണം ചെയ്യും. സർക്കാർ ടെൻഡർ നടപടിയിലൂടെയാണ് ടാറ്റ മോട്ടോഴ്‌സ് ഇ-ബിഡ് നേടിയത്.
ടാറ്റ മോട്ടോഴ്‌സിന് 1000 ബസുകളുടെ ഓർഡർ നൽകുന്നതിൽ സന്തോഷമുണ്ടെന്ന് ഹരിയാനയിലെ ഗതാഗത വകുപ്പ് പ്രിൻസിപ്പൽ സെക്രട്ടറി നവ്ദീപ് സിംഗ് പറഞ്ഞു. ആധുനികവും സാമ്പത്തികവുമായ BS6 ബസുകൾ സംസ്ഥാനത്തിന് മുതൽ കൂട്ടാകുമെന്നും ജനങ്ങൾക്ക് ആശ്വാസമാകുമെന്നും അദ്ദേഹം പ്രതികരിച്ചു. സംസ്ഥാനത്തുടനീളം സുഗമമായ യാത്രാസൗകര്യം ഒരുക്കാനും അന്തർ സംസ്ഥാന പൊതുഗതാഗതം കൂടുതൽ കാര്യക്ഷമമാക്കുന്നതിനും പുതിയ ബസുകൾ സഹായിക്കും.
ഹരിയാന റോഡ്‌വേസിൽ നിന്ന് വലിയ തരത്തിൽ ഓർഡർ ലഭിച്ചതിൽ തങ്ങൾ സന്തുഷ്ടരാണെന്ന് ടാറ്റ മോട്ടോഴ്‌സിന്റെ പ്രൊഡക്‌ട് ലൈൻ വൈസ് പ്രസിഡന്റ് രോഹിത് ശ്രീവാസ്തവ പറഞ്ഞു. ബസുകൾ നൽകുന്നതിലൂടെ ഹരിയാന സർക്കാരുമായുള്ള ടാറ്റയുടെ പങ്കാളിത്തം കൂടുതൽ ശക്തിപ്പെടുമെന്നും ജനങ്ങൾക്ക് ആധുനിക പൊതുഗതാഗത സൗകര്യം ലഭ്യമാക്കാൻ സഹായിക്കുമെന്നും അദ്ദേഹം പറഞ്ഞു. നേരത്തെ, 2022 ഒക്ടോബറിൽ ജമ്മു സ്മാർട്ട് സിറ്റി ലിമിറ്റഡിന്റെ 200 ഇലക്ട്രിക് ബസുകളുടെ ടെൻഡർ ടാറ്റ മോട്ടോഴ്‌സ് നേടിയിരുന്നു. മാത്രമല്ല, 2022 സെപ്റ്റംബറിൽ ഡൽഹി ട്രാൻസ്‌പോർട്ട് കോർപ്പറേഷനിൽ (ഡിടിസി) നിന്ന് അതിന്റെ ഓൾ-ഇലക്ട്രിക് സ്റ്റാർ ബസിന്റെ 1,500 ഓർഡറും ടാറ്റ നേടിയിട്ടുണ്ട്.
