കീവ് : യുദ്ധമുഖത്ത് നിൽക്കുന്ന യുക്രെയ്ൻ സന്ദർശിച്ച് ബ്രിട്ടീഷ് പ്രധാനമന്ത്രി ഋഷി സുനക്. പ്രധാനമന്ത്രിയായി അധികാരമേറ്റതിന് ശേഷം ആദ്യമായാണ് അദ്ദേഹം യുക്രെയ്ൻ സന്ദർശിക്കുന്നത്. വൊലോഡിമിർ സെലൻസ്കിയുമായി കൂടിക്കാഴ്ച നടത്തിയ സുനക്, യുക്രെയ്ന് എല്ലാ പിന്തുണയും നൽകുമെന്ന് അറിയിച്ചു.
”സ്വാതന്ത്ര്യത്തിന് വേണ്ടി പോരാടുക എന്നതിന്റെ അർത്ഥം എന്താണെന്ന് ബ്രിട്ടണ് അറിയാം. ഞങ്ങൾ എന്നും നിങ്ങളോടൊപ്പമുണ്ടാകും” എന്നാണ് സുനക് പറഞ്ഞത്. സുനക് പ്രധാനമന്ത്രിയായി അധികാരത്തിലേറിയ ശേഷം ആദ്യമായിട്ടാണ് സെലൻസ്കിയുമായി കൂടിക്കാഴ്ച നടത്തുന്നത് എന്ന പ്രത്യേകത കൂടിയുണ്ട് ഇതിന്.
യുകെ പ്രധാനമന്ത്രിയുടെ സന്ദർശനത്തിൽ സെലൻസ്കി നന്ദി അറിയിച്ചു. നിങ്ങളെപ്പോലുള്ള സുഹൃത്തുക്കൾ കൂടെയുണ്ടെങ്കിൽ വിജയം ഉറപ്പാണ്. എന്താണ് സ്വാതന്ത്ര്യത്തിന് വേണ്ടിയുള്ള പോരാട്ടമെന്ന് ഇരു രാജ്യങ്ങൾക്കുമറിയാം എന്നും സെലൻസ്കി ട്വിറ്ററിൽ കുറിച്ചു.
നേരത്തെ യുക്രെയ്ൻ സ്വാതന്ത്ര്യദിനത്തിൽ, റഷ്യയ്ക്കെതിരെ ചെറുത്തുനിൽക്കാൻ കാണിച്ച രാജ്യത്തിന്റെ ധൈര്യത്തെ പ്രകീർത്തിച്ചുകൊണ്ട് സുനക് കത്തയച്ചിരുന്നു. ബ്രിട്ടൺ എന്നും യുക്രെയ്നൊപ്പമുണ്ടാകുമെന്നും അന്ന് ഉറപ്പ് നൽകിയിരുന്നു. രാജ്യത്തെ ഉയർത്താനും സമ്പന്നമാക്കാനും താൻ ഒന്നിച്ച് നിന്ന് പ്രവർത്തിക്കുമെന്നാണ് സുനക് കത്തിൽ പരാമർശിച്ചത്.
