ന്യൂയോർക്ക്: വീൽചെയറിൽ കൊക്കെയ്ൻ കടത്താൻ ശ്രമിച്ചതിന് യുവതി പിടിയിൽ. 4,50,000 ഡോളർ (3.66 കോടി രൂപ) വിലമതിക്കുന്ന കൊക്കെയ്നാണ് യുവതി വീൽചെയറിലൂടെ കടത്താൻ ശ്രമിച്ചത്. ഡൊമിനിക്കൻ റിപ്പബ്ലിക്കിൽ നിന്ന് അമേരിക്കയിലേക്ക് പോകുകയായിരുന്ന യുവതിയെ ന്യൂയോർക്ക് സിറ്റിയിലുള്ള ജോൺ എഫ് കെന്നെഡി അന്താരാഷ്ട്ര വിമാനത്താവളത്തിൽ നിന്ന് പിടികൂടുകയായിരുന്നു.
എമിലിന പൗലിനോ ഡി റിവാസ് എന്ന യുവതിയാണ് അറസ്റ്റിലായത്. യുഎസിന്റെ കസ്റ്റംസ് ഡിപ്പാർട്ട്മെന്റും ബോർഡർ പ്രൊട്ടക്ഷൻ ഫോഴ്സും ചേർന്ന് എമിലിനയുടെ പക്കലുണ്ടായിരുന്ന ലഹരിമരുന്ന് കണ്ടെടുത്തു. വീൽചെയർ നീങ്ങുന്നത് കണ്ടപ്പോൾ പന്തികേട് തോന്നിയതിനെ തുടർന്ന് എക്സ്റേ പരിശോധന നടത്തുകയായിരുന്നു ഉദ്യോഗസ്ഥർ. തുടർന്ന് വീൽചെയറിന്റെ നാല് ചക്രങ്ങൾക്കിടയിലും ഒളിപ്പിച്ചുവെച്ച കൊക്കെയ്ൻ കണ്ടെത്തി. സംഭവത്തിൽ ലഹരിക്കടത്ത് നിയമപ്രകാരമുള്ള നടപടികൾ നേരിടുകയാണ് യുവതി.
