ശരീരത്തിൽ നിന്നും ദുർഗന്ധം വമിക്കുന്നത് തടയാൻ പലപ്പോഴും നമുക്ക് സാധിക്കില്ല. കാരണം നമ്മുടെ നിയന്ത്രണത്തിൽ അല്ലാത്ത കാര്യമാണത്. എന്നിരുന്നാലും ചില കാര്യങ്ങൾ ശ്രദ്ധിച്ചാൽ വിയർപ്പ് ഗന്ധം ഒരു പരിധി വരെ തടയാനാകും. അത്തർ പൂശുകയും സുഗന്ധമുള്ള സോപ്പ് ഉപയോഗിക്കുകയുമല്ലാതെ മറ്റ് വഴികൾ എന്തെല്ലാമാണെന്ന് നോക്കാം..
ശരീരത്തിന് ഏറ്റവും സുഖപ്രദമെന്ന് തോന്നുന്ന വസ്ത്രങ്ങൾ ധരിക്കുക. സിന്തറ്റിക്ക് വസ്ത്രങ്ങളും ഇറുകിയ വസ്ത്രങ്ങളും ഒഴിവാക്കാം. സുഖപ്രദമായ അയഞ്ഞ കോട്ടൺ വസ്ത്രങ്ങൾ ധരിക്കുന്നത് വിയർപ്പുനാറ്റത്തെ ഒരു പരിധി വരെ തടയും. സ്ലീവ്ലെസ്സ് ആയ വസ്ത്രങ്ങൾ വിയർപ്പുഗന്ധത്തെ വർധിപ്പിക്കും.
അനാവശ്യമായ രോമങ്ങൾ നീക്കം ചെയ്യുന്നത് വിയർപ്പുഗന്ധം കുറയ്ക്കാൻ സഹായിക്കും. ശരീരത്തിൽ രോമങ്ങൾ നിലനിൽക്കുന്നിടത്ത് ബാക്ടീരിയ പെരുകാൻ സാധ്യതയുണ്ട്. ഇതുവഴി വിയർപ്പുഗന്ധവും വർധിക്കുന്നു. അതിനാൽ ശരീരത്തിലെ അനാവശ്യ രോമങ്ങൾ നീക്കം ചെയ്ത് ശുചിയായി സൂക്ഷിക്കുക.
വൃത്തിയുള്ള വസ്ത്രങ്ങൾ ധരിക്കുക എന്നതും പ്രധാനപ്പെട്ടതാണ്. സുഗന്ധമുള്ള ഡിറ്റർജെന്റുകൾ ഉപയോഗിച്ച് കഴുകിയ വസ്ത്രങ്ങൾ വിയർപ്പുഗന്ധത്തെ ഒഴിവാക്കാൻ ഗുണം ചെയ്യും. ഒരിക്കൽ ധരിച്ച വസ്ത്രങ്ങൾ കഴുകിയതിന് ശേഷം മാത്രം പിന്നീട് ധരിക്കുക. അലക്കാത്ത വസ്ത്രങ്ങൾ അണിയുന്നത് വിയർപ്പുഗന്ധം വമിക്കാൻ കാരണമാകും.
ചില ഭക്ഷണങ്ങൾ ഒഴിവാക്കുന്നതും വിയർപ്പിനെ സ്വാധീനിക്കും. കഴിക്കുന്ന ഭക്ഷണങ്ങൾക്ക് അനുസരിച്ചാണ് പലപ്പോഴും നമ്മുടെ ശരീരത്തിൽ നിന്നും പുറത്തുപോകുന്ന വിയർപ്പിന് ഗന്ധമുണ്ടാകുക. സൾഫർ ഉയർന്ന അളവിൽ അടങ്ങിയിരിക്കുന്ന ഭക്ഷണങ്ങളാണ് വിയർപ്പുഗന്ധത്തിന് പ്രധാനമായും കാരണമാകുന്നത്. സവാള, വെളുത്തുള്ളി തുടങ്ങിയവ ആഹാരത്തിൽ കൂടുതലായി ഉപയോഗിച്ചാലും വിയർപ്പുഗന്ധമുണ്ടാകും.
ആന്റി-ബാക്ടരീയൽ സോപ്പുകൾ ഉപയോഗിക്കാവുന്നതാണ്. പെർഫ്യൂം ഉപയോഗിക്കാൻ സാധിക്കാത്തവർക്ക് ആന്റി-ബാക്ടരീയൽ സോപ്പുകൾ നല്ലൊരു ഓപ്ഷനാണ്. അതുമല്ലെങ്കിൽ ആന്റി ഫംഗൽ പൗഡറായ ക്ലോട്രിമസോൾ പൗഡർ ഉപയോഗിക്കാം. ഇത് വിയർപ്പ് ആഗിരണം ചെയ്യാൻ സഹായിക്കും.
