മുംബൈ: ബോക്സ് ഓഫീസിൽ തരംഗം തീർത്ത് ‘ദൃശ്യം 2 (ഹിന്ദി)‘ മുന്നേറുന്നതിനിടെ ആരാധകരെ വീണ്ടും ആവേശത്തിലാക്കി അജയ് ദേവ്ഗണിന്റെ പുതിയ ചിത്രം ‘ഭോല‘ ടീസർ. കാർത്തിയെ നായകനാക്കി 2019ൽ ലോകേഷ് കനകരാജ് സംവിധാനം ചെയ്ത സൂപ്പർ ഹിറ്റ് തമിഴ് ചിത്രം കൈതിയുടെ ഹിന്ദി റീമേക്കാണ് ഭോല. തബു, അമല പോൾ എന്നിവരാണ് ഭോലയിൽ നായികമാരായി എത്തുന്നത്. അജയ് ദേവ്ഗൺ തന്നെയാണ് ചിത്രം സംവിധാനം ചെയ്യുന്നത്.
തന്നെ കാണാൻ ആരോ വരുന്നു എന്ന് അനാഥാലയത്തിലെ ഒരു പെൺകുട്ടിയെ ഒരാൾ അറിയിക്കുന്നതോടെയാണ് ടീസർ ആരംഭിക്കുന്നത്. തന്നെ കാണാൻ വരുന്നത് ആരാണെന്ന് കുട്ടി അത്ഭുതത്തോടെ ചിന്തിക്കുന്നു. അടുത്ത രംഗത്തിൽ, കേന്ദ്ര കഥാപാത്രത്തെ അവതരിപ്പിക്കുന്ന അജയ് ദേഫ്ഗൺ ഭഗവത് ഗീതയും വായിച്ച് ഇരിക്കുന്നു. ജയിലിൽ നിന്ന് ഇറങ്ങാൻ സമയമായെന്ന് അപ്പോൾ ആരോ അറിയിക്കുന്നു.
‘നെറ്റിയിൽ ഭസ്മമണിഞ്ഞാൽ അയാൾ എത്ര പേരെ ഭസ്മമാക്കുമെന്ന് പറയാൻ കഴിയില്ല‘ എന്ന് ഒരു കഥാപാത്രം പറയുമ്പോൾ, നെറ്റിയിൽ ഭസ്മം ധരിച്ച അജയ് ദേവ്ഗൺ ബൈക്ക് ഓടിച്ച് കാറിലേക്ക് കയറ്റുന്നതും ത്രിശൂലവുമായി കാറിലേക്ക് ചാടുന്നതും കാണാം.
3ഡിയിലാണ് ചിത്രം ഒരുങ്ങുന്നത്. അജയ് ദേവ്ഗൺ ഫിലിംസ്, ടി സീരീസ് ഫിലിംസ്, റിലയൻസ് എന്റർടെയ്ന്മെന്റ്, ഡ്രീം വാറിയർ പിക്ചേഴ്സ് എന്നിവർ ചേർന്ന് നിർമ്മിക്കുന്ന ‘ഭോല‘ 2023 മാർച്ച് 30നാണ് തിയേറ്ററുകളിൽ എത്തുന്നത്.
