ഭർത്താവിന് 1.3 കോടി ലോട്ടറിയടിച്ചു; മൂന്ന് കുട്ടികളുടെ അമ്മ പണവുമായി കാമുകനൊപ്പം ഒളിച്ചോടി

തായ്‌ലന്റ : ഭർത്താവിന് ലോട്ടറിയടിച്ച തുകയുമായി ഭാര്യ കാമുകനൊപ്പം മുങ്ങി. ലോട്ടറിയടിച്ച് മണിക്കൂറുകൾക്കകമാണ് ഇവർ പണമെല്ലാമെടുത്ത് കാമുകന്റെ കൂടെ ഒളിച്ചോടി പോയത്. തായ്‌ലാന്റിലാണ് സംഭവം. മണിത്ത് എന്നയാൾക്കാണ് 6 മില്യൺ ബട്ട്(1.3 കോടി രൂപ) ലോട്ടറി അടിച്ചത്. ഈ തുകയുടെ ഒരു ഭാഗം ക്ഷേത്രത്തിലേക്ക് എഴുതിക്കൊടുക്കാനും ബാക്കി കുടുംബാംഗങ്ങൾക്ക് നൽകാനുമാണ് ഇയാൾ തീരുമാനിച്ചിരുന്നത്. എന്നാൽ എല്ലാ ആഗ്രഹങ്ങളും ഇല്ലാതാക്കിക്കൊണ്ട് ഭാര്യ അങ്കണാറത്ത് കാമുകനൊപ്പം ഒളിച്ചോടുകയായിരുന്നു.

26 വർഷമായി ഇവർ ഒന്നിച്ച് ജീവിക്കുന്നു. മൂന്ന് കുട്ടികളുമുണ്ട്. എന്നാൽ ഔദ്യോഗിക രേഖകൾ പ്രകാരം ഇവർ വിവാഹിതരല്ലെന്ന് പോലീസ് പറഞ്ഞു.

സമ്മാനത്തുക നൽകുന്ന പരിപാടിക്കിടെയാണ് ഭാര്യ ഒളിച്ചോടിയത്. അപരിചിതനായ ഒരാൾ പരിപാടിക്ക് എത്തിയിരുന്നു. ഇത് ആരാണെന്ന് മണിത്ത് ചോദിച്ചപ്പോൾ ഒരു അകന്ന ബന്ധുവാണെന്നാണ് ഇവർ പറഞ്ഞത്. ഇതിന് പിന്നാലെയാണ് പണവുമായി അങ്കണാറത്ത് മുങ്ങിയത്. ഭാര്യയുടെ ഈ ബന്ധത്തെക്കുറിച്ച് തനിക്ക് അറിയില്ലായിരുന്നുവെന്ന് ഭർത്താവ് പറഞ്ഞു. എന്നാൽ മകന് ഇക്കാര്യം അറിയാമായിരുന്നു.

ഒളിച്ചോടി മണിക്കൂറുകൾക്കകം ഇവരെ ഫോണിൽ ബന്ധപ്പെടാൻ ശ്രമിച്ചുവെങ്കിലും സാധിച്ചില്ല. ലോട്ടറി അടിച്ച തുക മണിത്ത് ഭാര്യയ്‌ക്ക് സമ്മാനിച്ചതായേ കരുതൂ എന്ന് പോലീസ് പറഞ്ഞു. പണം തിരികെ വാങ്ങാനോ അതിനായി നിയമപരമായി നീങ്ങാനോ സാധിക്കില്ലെന്നാണ് പോലീസ് വാദം. എന്തായാലും ഇവരെ വിളിച്ച് വിവരങ്ങൾ അന്വേഷിക്കാനുള്ള ശ്രമങ്ങൾ നടക്കുന്നുണ്ട്.