ഭാര്യ എലിസബത്തുമൊത്തുള്ള വീഡിയോ പങ്കുവച്ച് നടൻ ബാല. ഇരുവരും പിരിഞ്ഞുവെന്ന അഭ്യൂഹം ശക്തമാകുന്നതിനിടയിലാണ് എലിസബത്തിനൊപ്പമുള്ള വീഡിയോ ബാല സമൂഹമാദ്ധ്യമങ്ങളിൽ പങ്കുവച്ചിരിക്കുന്നത്. കഴിഞ്ഞ വർഷമായിരുന്നു എലിസബത്തുമായിട്ടുള്ള ബാലയുടെ രണ്ടാം വിവാഹം. വിവാഹം കഴിഞ്ഞതു മുതൽ എലിസബത്തുമൊത്തുള്ള വീഡിയോകളും ചിത്രങ്ങളും ബാല സ്ഥിരമായി സമൂഹമാദ്ധ്യമങ്ങളിൽ പങ്കുവച്ചിരുന്നു. എന്നാൽ അടുത്തിടെയായി ബാലയുമൊത്തുള്ള വീഡിയോകളിൽ എലിസബത്തിനെ കാണാറില്ലായിരുന്നു.
ഇതിന് പിന്നാലെയാണ് ഇരുവരും പിരിഞ്ഞുവെന്ന തരത്തിൽ അഭ്യൂഹം ശക്തമായത്. എന്നാൽ എല്ലാ അഭ്യൂഹങ്ങളും അവസാനിപ്പിച്ചു കൊണ്ടാണ് എലിസബത്തുമൊത്തുള്ള പുതിയ വീഡിയോ ബാല പുറത്ത് വിട്ടത്. എലിസബത്ത് എന്നേക്കും എന്റേതാണ് എന്ന തലക്കെട്ടോടെയാണ് പുതിയ വീഡിയോ ബാല പങ്കുവച്ചിരിക്കുന്നത്. ‘ എന്റെ കൂളിംഗ് ഗ്ലാസ് ഒരാൾ അടിച്ചു മാറ്റി …അതാരാണെന്ന് കാണിച്ചു തരാമെന്ന്’ പറഞ്ഞാണ് എലിസബത്തിനെ ബാല വീഡിയോയ്ക്ക് മുന്നിലേക്ക് ക്ഷണിക്കുന്നത്. തുടർന്ന് ഇരുവരും ചേർന്ന് വിജയിയുടെ രഞ്ജിതമേ എന്ന ഗാനത്തിനൊപ്പം നൃത്തം വയ്ക്കുന്നതും കാണാം.
സമൂഹമാദ്ധ്യമങ്ങളിൽ ഈ വീഡിയോ ഹിറ്റായി മാറിയിരിക്കുകയാണ്. ഇരുവരേയും വീണ്ടും ഒരുമിച്ച് കാണാൻ പറ്റിയതിൽ സന്തോഷമെന്നാണ് ആരാധകർ പറയുന്നത്.
Comments